半天四圍hea

星期六勁攰唔知醒,約人七點打網球,六點九先起身,好在兒時返學練個招五分鐘出門大法仲記得(不過依家好似用咗七分鐘),去到都係遲咗三分鐘(當然要的的去啦).下星期開始都要遲一個鐘先打啦,太陽伯伯遲咗起身,加上天氣轉涼,好難做熱身,早打都係浪費晒啲時間係熱身處.

返到屋企hea咗陣就去圓方行一圈,入到去發覺有啲店舖都仲未開,最好笑就係間戲院,周圍貼晒紙似未開張,但係又有地方賣票,平常戲院都會有啲大poster介紹播緊乜戲,佢又冇,有幾枝銀行排隊個啲圍欄上面有個牌仔寫住套3D戲星期六日都全滿,個入口位仲好笑,又係得幾枝圍欄上面有個牌仔寫住係戲院入口咁上下,企咗個職員係度查票,咁啱係食飯時候,裡面有幾個戴晒工帽的地盤阿姐行出來...呢啲地方點睇戲呀,仲要收人正價...

之後本來打算搵啲野食啦,除咗早前有網友話個間泰國野唔好食唔諗之外,見到四圍都係有咁多人排隊,都係唔食啦,出番佐敦食就算啦.係咁就好快咁行咗間超市一圈,其實我好驚係餓的時候去行超市,通常都會買咗一大堆唔知乜的食材返屋企,但係今次又冇喎.間"360"其實都係牛奶公司的,跟德福間一樣,走相同路線,但係用咗唔同名,貨品種類會多啲...總的來說,圓方唔係一個咁有特色的商場,硬件可以說係OK個種,但係啲軟件(商舖)就都係個幾間大牌子,跟中環,海港城差不多.地理位置已經唔係咁好,品種又冇乜特別,過完呢轉人氣潮之後都唔係咁樂觀...

食完晏仔就行咗去旺角"買餸",行咗成個街市,發覺螃蟹當道,餘下的海鮮都係一般貨色,兩位C君仲話身痕要再食海鮮,都唔知下次要搵啲乜比佢食囉...最後都係返土瓜灣買就算啦...