20100731的晚餐

今晚又跟書整咗個洋蔥鴨。

米鴨一隻洗淨去多餘的肥，抹乾後用油炸至金黃色。半磅腩肉用油泡後備用。另外爆香二両薑片，加入七個每個開八份的洋蔥，炒香後加入一罐啤酒，一大匙老抽，四大匙生抽，一両冰糖，一茶匙鹽，一個八角及半杯水。煮沸後加入腩肉及鴨，鴨胸向下用中火炆四十五分鐘，反轉多炆四十五分鐘，如果想啲肉有咬口就可以上碟，想軟身啲就反轉多三十分鐘。

20100728的晚餐

好在黑雨走得快，收工時仲可以去街市買餸整揚州清湯獅子頭。

買咗半斤海中蝦，十二両半肥瘦，刴好後加入薑汁、鹽、糖、生粉及胡椒粉，拌勻後分成兩大個丸子，注入高湯，燉二小時。

蝦殼就用來煮蝦湯底做冬蔭公。

肥肉比例以今天的標準就會略多，下次再整就可以減半。

20100727的晚餐

今晚食埋啲隔夜餸，另外加一個文思豆腐羹。

做法比想像中容易得多，因為雪櫃有高湯的存貨。

豆腐就用上盒裝豆腐，中間分開兩份之後再打橫開三等份。每塊豆腐先切薄片，略攤平之後再切幼絲，因為塊熟食枮板表面比較「鞋」，攤開時只有前半部分可以推開攤平，而後半就比較企身，所以切出來時粗幼不均。其實大部份都好幼身，只不過是粗的比較容易浮面，切好的豆腐絲放入清水備用，整個過程都不用十分鐘。湯底煮熱後加鹽調味，因為懶爬高去取馬蹄粉，用生粉埋芡個湯底會混濁一點。放入豆腐絲加少許麻油就完成。

由於有幼滑的豆腐絲在羹中，食時口感如絲般幼滑，加上自製高湯（有少許西班牙腿骨）的味道，整體效果相當好。

環境保育

香港的未來都不知道會變成一個怎樣的社會．．．

一班對歷史不了解的人．．．

一些對產權不尊重的人．．．

以後的社會不知怎樣的走．．．

．

無可否認，西貢是香港的後花園，現今在城市長大的人，多見高樓少見樹林，去到一片廣闊樹林的地方，有山景又有河溪當然會有點興奮。一聽到有一片「樹林」被除去，就異常亢奮地「起錨」。

．

如果真係對香港的郊野有認識的人士都會知道，在上世紀七十年代成立郊野公園之時，政府只是將一些政府擁有的鄉郊地方劃成郊野公園。所以大家細閱郊遊圖時一定會發現郊野公園的範圍不是連貫的，當中有很多鄉村用地都不劃在郊野公園範圍之內。當然一提到原居民的問題就會走出一系列的其他問題來．．．

．

香港近廿多三十年市區的變化很大，但鄉郊的演變跟城市的差距越來越遠。但又因為這些差距，年青的一輩對未開發的鄉郊景色有著一種特殊的情結。不過大家要留意的就是雖然這些土地是沒有人打理的，但絕不代表這是大家的家產。

．

近年溫爺爺提出的「深層次矛盾」現在續一浮現，要是這個項目不是有錢人去發展的話，而是一些鄉民將自己地方去裝飾一下，大家又會不會有著相同的反應呢。

．

如果大家真是關心我們的家，為什麼早陣子政府要將將軍澳的堆填區伸展入去清水灣郊野公園時一些所謂的環保團體又沒有這樣大的反應呢．．．

．

口講環保，但一涉及自身利益時大家就會不了了之。

．

20100726的晚餐

本來昨日煮的餸菜，今晚有心機就整來吃。

金平牛蒡。主要都係切餐死，加啲醬料炒就可以。

另外煮熱早日整好的牛腩又一餐啦。

20100725的晚餐

上午的天氣仲係好舒適，到下午開始就非常熱，行完各大超市返來都唔想煮。

煎咗塊NZ西冷，加啲羅馬生菜又一餐啦。

20100724的晚餐

食到冇野好食又食返燒烤食品。

雞軟骨分別用柚子胡椒及蒜味椒鹽醃。

又買咗啲鰰魚來燒。

另外又買咗啲蘇格蘭石蠔返來，兩隻生吃。

另外兩隻就烤至開口。

20100722的晚餐

今日做咗成日未停過，諗住早點收工，點知上車後先知道係黑雨。

咁就坐咗存瀑布巴士返屋企，上車時開始大返雨，開車後就車窗一直好似瀑布咁。

下車時發覺條街變咗漲潮時的聖馬可廣場，當有車行過時就會將啲水推入店舖內。

每個過馬路位都有一呎水深，要找一條較高的路線回家，結果都要弄濕對鞋才可以回到家中。

回家準備晚餐，忽然個天光亮咗，即刻拍返張黑雨的日落照。

豉椒苦瓜炒牛肉及香煎鯖魚佐拜爾內滋醬（Beignets de Maquereau, Sauce Bahiannaise）。

今次又跟足教科書去做，重點係個醬，一條急凍鯖魚柳斜切一厘米闊，一隻蛋黃加一大匙芥末，加200ml沙律油打好，再拌入半個牛油果、相同重量的木瓜及芒果切碎，用鹽、胡椒及Cayenne Pepper調味。另外準備用20克的粟粉、20克的麵粉、1克的泡打粉及適量的水混合好的粉漿。用中溫油去炸。

加上沾醬後的鯖魚。

20100720的晚餐

早日係吉X島買咗啲米國牛肋排，用韓式醬醃咗兩日，今日加多包韓風魷魚，用羅生菜加韓式辣醬包來吃。

20100719的晚餐

昨夜劏好的十両魚仔，今日先煎香，再加白酒、少量茴香、香葉、黑白胡椒粒及水去煲湯底。

另外就炒香鮮蕃茄粒及茴香，再加入蕃茄膏炒香，隔入煲好的湯底，煲片刻後調味做湯飯。

另外蒸咗三條魚仔，黃腳鱲仔仔、海斑仔及白䱛各一條。海魚的肉質跟養的有天壤之別，但最好食都係黃腳鱲仔仔。

ＸＯ醬炒翠玉瓜。

 

20100718的晚餐

釣到條斤半的花䱛回來，當然係即刻食咗佢，因為成十七吋長原條放入雪櫃有難度。

相比條魚，我把刀都變得好細把。

唔好問係乜．．．魚春啦。

係條花䱛的。今次條魚唔係正常的開肚方法，係肛門位開一刀，再由腮位將全部內臟拉出。

釀入鮮茴香及檸檬片加蛋白、鹽及麵粉去焗。我屋企係冇可能蒸到呢條魚的。

第一次食花䱛，肉質比較乾身，終於明白點解用來做鹹魚啦。

遊 船 河 釣 魚 仔

打完風，天氣非常好，海面冇乜大浪，只有暗湧。

九點幾係香港仔落船，向南丫島以南的香港邊緣出發。船家一早已經在船頭張好帳篷，可以好舒服的享受海風。

遠處的外伶仃島。

南丫島南端的燈塔。

東面的蒲台。

好靚的雲。

由於早日打完風，翻亂晒個海底，魚獲唔係好多。船家話早兩日的魚好多，不過浪就好大，佢地都話大就真係好大啦。第一次係船釣，第一次用手牌。船家不停咁轉位，上午的收獲來來去去都係啲斑仔多，油「魚追」就好多啦，放晒入雪箱，冇拍到。

釣到三點幾，再次轉位到南丫島的東南面之後，下層啲水流好急，加上用上重鉛，手感冇乜。水深有七十幾呎，加埋水流打沉底應該過一百呎。有幾次都比條魚一口搶走晒成隻蝦，有次仲入埋石．．．

換上新鉤之後終於等到呢一刻啦，有一下大口之後就即刻快收兩手絲，唔比佢入石堆，之後感覺到有阻力就用平均速度收上來，中間有感覺到佢有少許抵抗，上到水面見有呎幾長，上到來個肚向上（只見到白色），見佢冇片水（應該係冇郁）就一手抽上船，上到來佢都冇乜郁，只係個腮開開合合，我估快收個百呎絲都用晒佢啲力。唔好以為佢神仙咗，玩到上岸都仲有呼吸，只不過係個桶細，佢轉唔到身。

四點九回航，五點五上岸，船家又要清理隻船趕下場。

我應該只係釣咗一條花䱛、黃腳鱲仔仔、一條斑仔仔，仲有一條雞泡。老婆就一開始釣咗條油「魚追」仔，兩條斑仔。其他的都是同船釣完唔要分返來的。

返到去當然要量度下收獲啦，條花䱛有斤半重。

十七吋長。

魚仔就有十両半重。

可憐的黃腳鱲仔得二両重，想放生的，不過解完鉤都已經重傷。

本來Kelly有得食呢條全日最大的六両斑仔。

加數條魚仔。

見有時間就將所有魚仔處理好後吸乾水份再放入冰格冷藏。