20110430@雲霧中的鳳

平日最好去離島玩，一早起身係老麥食個早，即刻上車去東涌。

搭架平車上伯公坳，點知下車時車長話有分段的，六蚊就可以啦。

上下的天氣尚可，一到山坳就．．．

大東山上來之前已經唔見咗，上到來就連另一邊都唔見埋。

開始上山，不久有個亭，上次係大東個邊下來時已經見到呢個亭。有個碑紀念零三年有位公職人員在此附近殉職。

全程都係雲霧中行走。

再上高啲能見度都係得十米左右。

中間的一個亭，唔戴眼鏡仲清楚過戴，因為鏡片上全部都係水滴。

拍埋呢張都收返埋部相機，一來沿途唔會再有乜好拍，二來要多一隻手來平衡背包的重量，因為預計有艷陽，水帶多了一些，結果最後有一升半水剩。

越上得高，風就越大，如果上山前塗上洗髮水，呢個位置可以過水啦。

過咗八百高之後，行行下聽到上面有人聲，先知原來係雲霧中行得咁快，水平一百上一百都係一陣間的事．．．

上到來見鳳不見凰．．．

停咗十分鐘，就開始下山，此時又係有電話來問Excel時間．．．

此處可以往狗牙嶺，不過今天當然唔會去。

去到五百高都仲未低過啲雲。

天秤吊纜車。

就到佛誕。

下山的路段都算輕鬆，開始下雨，唔過心經簡林個邊啦。

呢個係假象，唔夠五分鐘就開始出猛太陽．．．

真係五分鐘時間左右．．．

附近都冇乜好食，都係搭車去大澳吃午餐。原本巴士係一小時一班，有位師傅話如果有足夠人排隊就會開加班車，不一會真係有班持優惠票的遊客來排隊，十五分鐘唔夠的路程收六元六，廿人都為到皮。

去到大澳好曬，相都唔拍就急急腳去搵吃。先來一大枝啤酒解暑先．．．

食完行一陣都係頂唔住個太陽就車轉車返屋企啦。

20110430的晚餐

無聊去咗紅磡街市搵食材，見有大蟶子就買返來用豉汁粉絲蒸，另外又買咗啲游水赤米返來用蒜泥橄欖油去煮。

20110429的晚餐

昨晚飲得多過頭，今日個胃好辛苦。

老婆係街市買咗三條游水剝皮魚返來用豉汁去蒸，加啲吉Ｘ島醃好的羊肩肉及凍豆腐又一餐啦。

Wine Dinner@八月居

數年前參加過本地的試酒會，所配的食物都係以西式為主。

上月等車上班的時候見有介紹以澳洲酒配中菜的晚宴，因為平常都係食中式食物多，揀酒時非常懊惱，見個餐單都幾多常見菜色種類，當中所用的酒都是以下價酒為主，最適宜日常飲用。

呢隻牌子的酒杯係我喜歡的。

當然整枱的食客都係慕此名而來的。每隻杯都有顏色點作記認。

啲酒留返一陣再講。

八月居未食過，應該係我好耐冇出外食中式晚餐。聞說係米芝連推介菜色，不過鬼佬食中菜都係信唔過。上菜用西式上法，即係先比大家望一下，遲鈍一點都睇唔到個種，然後分好再個別上菜。

脆皮ＢＢ豬。餐館的招牌菜色，不過．．．只可以用及格二字來形容。食完返來係開飯見好多人都讚許，我又要再重新調節下啲食評標準啦．．．

如意金銀蝦球唔記得拍照。即係一隻普通蝦球加一隻上炸粉（可能係燕麥）的蝦。兩隻蝦都有梳打粉味，唔洗評啦．．．可能普通人唔覺得係什麼一回事，但係對一個食開唔用化學品煮的住家飯，飲餐酒飲到個嗅覺好敏感的人來講，少少化學味都會覺得好難頂。

龍皇加紗。即係芝士焗龍蝦，唔識評，跟我自己煮時的用料相差太遠，由芝士到係龍蝦都係．．．

招牌炸子雞。個做法都算幾好啦，不過都係以前食開個啲好味好多，呢樣係要怪我地個周局長唔肯比多啲鮮雞入口有關。

脆皮件坑腩。應該係燜完再炸，乾身咗啲，食牛腩冇汁又好似唔係好慣，啲肉冇渣都算係咁啦。

生爆黑椒豚肉。最不知所謂的菜色，一咬就食到有鬆肉粉味，句號。

翡翠其金鏤。呢隻鬼佬豆苗我唔係咁鍾意食的，佢個味太有個性。

金銀滿屋。飯粒乾身，由於飲咗好多酒，個口比較乾，口感唔係太好，平常可能係好事，不過今日就唔係太合適。

燕麥芝士餅．茉莉花脆糖布丁。冇期望，所以唔會失望。

其實今餐食品係配角，主角係點用啲餐酒去配唔同種類的中菜。

唉。。。有期望就會變成失望。。。

呢枱比較特別，主要係散客，即係唔係包枱個種，而年紀都比較大一點，只有兩個八十後。

都唔知係邊個的錯，中餐館到現在都係唔知點去處理啲餐酒。大家都可以容忍冇咁多Decanter，但係都唔係枝枝都等飲先開，餐酒唔同烈酒，唔breathe夠幾靚枝酒都唔會好飲。。。起碼早兩至三小時開定個蓋，個效果都會好好多。

包括枝Black Label在內，呢杯就係Black Label啦。睇返原來有15%酒精，呢個係紅酒的上限，我都係第一次見。

攪咗好耐先將啲酒精排走咗，不過個side effect就出咗來，飲唔出佢值咁多錢。

今晚係我飲咁耐餐酒以來飲得最多的一次，一晚七種酒唔係多（當年係澳洲獵人谷都試過一日試飲成三十種酒），不過個量就真係驚人，因為大家飲飲下又吹下水的情況下，我估最少有兩枝半，應該唔超過三枝。

20110426的晚餐

早日係吉Ｘ島買咗隻北京的雪鴨，返來再整法式橙鴨。

今次個鴨肚加入橙塊，等燒完隻鴨時肉質冇咁乾身。

今次個汁就隔清橙肉，效果比上一次好。

20110425的晚餐

早日買咗啲金菇，加啲薄切牛肉，整咗味都唔知有幾多年冇整過的金菇牛肉卷，加啲燒日本青椒仔及獅子狗卷又一餐啦。

20110424的晚餐

係德福買到份油甘魚鮫，自己調個柚子胡椒醬去燒，魚肉油份多，比吞拿魚更好食。另外就加少許早日滷好的鴨舌。

呢份豆腐比較硬身，唔係咁啱凍食用。

20110422的晚餐

今晚用雞蛋整咗份闊麪，食埋啲蕃茄醬。

另外就用墨魚釀日本青椒仔。