從雲雨雷暴的一天向TKO出發

七點半又起咗身啦,個天乜都有齊,最花時間個part又出場啦,切切切啲配料,跟住就煮兩個肉醬.

啲肉昨晚已經準備好,牛肉就用手切碎,豬肉都係叫肉檔攪碎好啲啦,加少少調味料醃一晚會入味啲,本人唔係好鐘意切豬,始終覺得佢啲質感好唔舒服,切咁多會死人嫁

.

都未試過兩個肉醬一齊煮,煲都唔夠用,唯有用鑊煮啦.

煮完都冇乜野要整,執好的工具同食材就向TKO出發啦.

仲有一天

話說以前係大昌都買過啲白肉魚好似大青衣柳，咁就懶老定咁放工走去買啦，點知原來冇買啦，咁就急急腳走番去街市睇下仲有冇得賣啦，行咗個圈，見有一尾大魚放咗係冰面度，個魚腩就比人買咗，問咗個魚販叫乜魚，佢話好似叫"摩利"（有啲鄉音），所以都唔知係乜，返來就去骨就好快，第一次去皮都唔係太難，係要小心啲肉唔好爛就得啦，中間啲紅色可能會魚腥味，聽日煮之前起堆佢．

跟住就係處理啲羊架啦，上次聽大哥話啲羊架冇起背脊位個條骨，食個時攪到好煩，都係起埋佢啦，以前買個啲都已經起好咗，不過貴好多．攞咗本書出來睇，依書解羊，個脊位都係搵唔到入，於是用暴力啦．

最後切埋啲牛肉同醃咗啲豬肉就完成咗今天的工作啦．

仲有二日

我個part仲差一兩味就齊啦.

仲有三日

Countdown開始啦，去咗和興行買NZ的羊架，四排都唔使320，但係個底枝脊骨好似未除，解完凍後再睇吓點

．每人都應該有2枝plus，之後去超市同街市買定啲罐頭及少量菜類．慢慢買慢慢做，得閒做定啲買定啲，個日就唔使咁辛苦啦，應該係好輕鬆先至啱

．

有人唔食豬，所以今次試整牛骨湯底，咁多功夫冇理由整兩磅湯咁少，於是買咗四斤幾骨，放入烤箱燒咗半個鐘，哇，頭個十分鐘個陣肉臭味真係想嘔

，但烤好個陣香味就非常香，好想食飯呀

．睇返又好似差少少火候，不過唔夠膽燒得太濃，驚有焦味就唔好啦．

仲有三個鐘．．．

-------------------------------------------------------------------------------------------------

已經煲咗3.5hr啦,要睡覺,所以要停,仲要做cooling同埋明日去油就完成個湯底啦.

陰晴不定的626

返到office先至八點半，做咗陣野就要準備出街啦，大約到九點正左右，我呢個MSN大鄉理發現個MSN開始陸續有人log-in（其實我自ICQ一出之後玩咗陣就冇玩過啲on-line野，覺得好花時間同埋太多interupt，直到阿kelly媽話要MSN喎咁就開番個MSN玩吓啦，所以依家都係下晏先至on-line，因為下晏通常都係做啲donkey野），點解啲人咁準時on-line嘅．

之後攪咗一輪後就出發去做measurement啦，從紅磡到汀角的一段路上經歷咗雲雨晴同雷暴，係九龍半島係陰天，出咗獅隧就變咗傾盤大雨，去到大學就有雷暴，到咗大埔就見到藍天白雲，到汀角時就有微微雨．攪下攪下就四點幾先返到office，飯都未有時間食，仲要處理埋啲data先至走得．

 

0626土瓜灣的早晨0615~0700

每當要早起的時候就係失眠的時候，睡到三點鐘，就比落雨聲叫醒咗，上咗陣網，到五點幾，有啲睡意，但又唔夠膽睡，驚七點鐘起唔到身，於是打開窗簾睇吓個天啦，依～～個天咁藍嘅，剛剛才聽到下雨聲，轉眼就藍天白雲．再過多陣，頂樓有一線陽光喎，唔係呀，太陽伯伯咁早出來，睇返個日曆先知道剛好過咗夏至，太陽伯伯又要起程返南半球啦．

唔想係屋企發毛，就走咗去海心公園附近的海岸影相．

又唔記得咗個太陽偏咗北邊出來，所以個日照角度唔係心目中個種，希望冬天有時間再影過啦．

經過特麗七彩處理後，CPL偏振個條環帶都出埋黎．

啲雲從西邊飄向東邊．

雲層都比較低，高層冇乜雲，今日的天氣變化會好大．

附近工廠大廈的顏色比較淺，低角度的照射反差會比較大，唔係咁喜歡．

呢班就係最早一班往北角開0705的渡輪，正在前往九龍城碼頭．

頂唔順啦，七點鐘個太陽好毒呀

好耐冇食嘅韓國餐

自從上年去完南韓之後，都只係去過一間日式韓國餐廳食過一個下午茶，今日終於走咗去尖沙嘴韓國街食野，話說以前都有幾間食肆，但依家就得返兩三間，於是就入咗呢間食．

呢啲就係前菜啦，同去開啲韓式燒烤唔同，冇咁多選擇，不過個泡菜就未夠時間，個味同菜係分開的．

第一味就係牛肉雜菇炒年糕，味係帶甜個種．

跟往就係韓式冷麵，個辣醬夠晒味．

最後就係海鮮蛋餅，全餐最失望的一個菜，一塊冇魂魄的蛋餅，似一團粉漿多過蛋餅，蛋都唔係貴野，唔使咁慳呀

，面頭見到紅色個啲係紅蘿蔔，如果我切的話就一開九，仲有個汁都唔知係乜．

616 Mijas @ 美利樓

星期六，見咁好天就坐船過海再轉巴士到赤柱行一圈．去到赤柱已經一點多，行咗去美利樓睇吓有乜食，見到豬手同香辣都唔想食，野火又唔吸引，於是發揮咗神農氏的本色去咗間新舖食西班牙野，仲有有個咁正嘅view，一於扮鬼佬啦，坐陽台食lunch．

年紀漸大，為免眼闊肚窄，都係叫少啲好，寧願一陣餓再食過都好過咁冇衣食．佢地個set lunch都幾特別，唔同combination收唔同錢．兩個人叫咗兩個頭盤，一個主菜，一個甜品及半jug荔枝西班牙什飲．但個仕應極力介紹咗個蕃茄包，而我倆對這個菜都幾喜歡，就叫一客啦．

上到枱，麵包係多士黎（其實有四件），未試過喎，儘管一試啦．點知又出事，個蕃茄醬冇味嘅，同個多士個口感唔夾喎，味唔夠就加鹽胡椒，西餐呢啲野好平常啫，淡咗點都好過濃咗，起碼有得救，但有樣野就神仙難救，個醬唔夠欖油

．

再睇吓個炸魷魚點先，個醬係油清做base，加埋啲魷魚帶起咗個腥味，個粉漿唔油炸得唔錯，但個皮又唔係脆又唔係腍個種，唔係唔好食，但個人就唔係咁喜歡呢種質感．跟住就係個羊肋骨，都知佢唔係上等羊，對肉質唔會有期望，睇吓佢用乜方法將啲羊油酥壓低，原來係用個松子醬，不過個醬咸咗啲，連啲蕃茄味都冇埋．

主菜啦，西班牙海鮮飯，整體都OK，不過個飯就冇原鑊上個種鑊香味道，濕咗少少，蕃紅花好似唔使錢咁，比我就唔捨得咁落啦．

最後就係甜品同咖啡，甜品係大黃crumble，之前未食過，大黃本身味勁酸有少許苦澀味，要用大量糖去中和，加埋薄荷清香就好好食，但唔知點解個底有一片好熟的芒果，勁甜個隻，單食就好好味，加埋就唔知邊個係主角，如果真係要減成本不如用啲冇咁甜但重果香個啲啦．

睇咗咁多相有冇發覺個presentation好正呢，一個好嘅賣相可以提升食慾，可能係新開的關係，水準可能去唔個樣咁好，呢個價錢又唔可以話好貴，計埋個view都算OK啦．

616 赤柱遊

食完晏，陽光仲係好猛，能見度幾好，遠處啲雲都好靚．

咁猛太陽都係行啲陰嘅地方好．

之後就行咗去軍人墳場，都唔係好記得有幾多年冇去啦．

行行吓見到朵玉蘭花開到好大，真係成個藥煲咁大．

由於太熱，又多野咬，於是就返去赤柱市集個邊．原來個新市政大樓係咁嘅，都算係政府建築物少有的佳作囉．

下次再來先食魚蛋粉啦．