雪櫃有枝未飲完嘅port，又買咗個日本蜜瓜返來，於是來個清舊貨行動，半杯port倒入半個蜜瓜內吃．
註：呢枝port係我飲咁多枝有年份同或20年以上嘅port之中最差的一枝，所以可以係個雪櫃放咗咁耐都唔"捨得"去飲．
2007年7月30日 星期一
2007年7月29日 星期日
729的一天
天氣酷熱，唔想曬，有乜好做呢，梗係去啲冷氣地方啦，食過"早餐"後，走咗去Mega box行一趟．Mega box都係唔就腳個種，係土瓜灣去都冇直車到，要係德福坐shuttle或利去，去到德福，冇理由唔睇吓啲商店，一睇又要買嘢，經過宜家，又入咗去行一轉，本來打算買個蒜泥夾，買吓買吓又買咗兩套焗碟／盤．之後就行咗去Mega box，入到去，底層都仲有啲商店未開，裝修味都好重，跟住就搭咗幾轉高速電梯上咗最高處行番落黎，最開心都係在運動用品店中買到對平拖鞋，行到半路有點餓就走番上去頂層食MOS BURGER，三點幾仲係好多人，要搵咗陣先有位食午餐，個包比麥當當好食，但唔算好突出囉．個層有個大溜冰場，老毛病梗係去睇吓有乜defect啦，見到佢個condensation比又一城個嚴重，日光日白啲玻璃同少許鏡面天花都有水點，睇黎都要花點功夫先攪得掂．食完都有點倦意，都係唔行個幾層傢具店啦，留番下次再來啦，走咗去搭11x，五分鐘都唔夠就返咗屋企啦．
放低啲戰利品就去街市行一趟，行咗一轉之後都搵唔到有乜好食，啲海鮮都係啲平常貨色，結果都係買咗條兩斤幾嘅冰鮮火點，起咗兩片fillet出來留起一半之後再加魚肚個少少腩位就用新買返來個焗盤加鋁紙焗，啲魚骨當然係去晒冰格啦．本來想買Le Creuset個套紅色陶瓷焗盤，但係個價位都係覺得唔值，於是轉去宜家搵，點知有白色套裝仲要係葡萄牙出的，40元就有一個方同鵝蛋型，諗都唔諗就買咗兩套啦(如果MIC就要考慮吓，始終太多負面新聞啦)．
係個底放上香茅，洋蔥片，檸檬片，黑白胡椒碎，少許橄欖油，放上魚片，再放上洋蔥片及檸檬片，黑白胡椒碎，橄欖油，味醂，糖及魚露，再灑上少許白酒，蓋上鋁紙焗．
由於未用過個焗盤同冇preheat個盤，200度15分鐘都只係個面白咗，最後要加多十分鐘先至剛熟(其實係用個鼻去嗅到啲檸檬香味先知入面啲液體已經煮沸)，出咗來之後由於個陶盤仲係非常熱，餘熱都仲可以慢慢弄熟條魚．
可能高估咗隻魚露的鹹味，冇再落鹽去焗，個檸檬唔夠酸，同少咗隻辣椒，結果要再落啲海鹽，檸檬汁及辣椒汁先至啱味．
用西式煮法去處理啲雪藏魚會比中式清蒸好，少許的魚鯹味都比啲配料中和晒，魚中剩餘啲鮮味都仲可以提返出來，不過前提都係要條魚夠"新鮮"同啲肉質夠滑，唔係就點整都唔掂．
2007年7月26日 星期四
2007年7月25日 星期三
2007年7月24日 星期二
2007年7月22日 星期日
大澳半天遊
經過星期六hea咗一日之後，星期天終於頂唔順要出去行一轉啦．是日睡到十時才起床，食完早餐，我倆就決定去大嶼山啦，天氣咁熱，上大佛定大澳好呢
，最後決定去大澳．對上一次去大澳都好耐囉，應該係棚屋大火後一個月內．坐咗兩個鐘頭巴士，去到大澳都成一點鐘，又未食得落午餐，於是就沿棚屋行一圈啦．今次時間幾好，成個大澳都好熱鬧，比起上次的滄桑味感覺良好很多．行了片刻，一陣燒烤香味撲鼻，原來是傳統的炭爐燒烤小食，但材料就是一些幾小見的食材，有賴尿蝦乾，魷魚乾同魚子乾．買了賴尿蝦乾及魚子乾又再上路啦，不過都係賴尿蝦乾好食啲．
原來現在喜歡將啲鯊魚皮攞出來曬，都唔知有乜用．
鹹魚當然是招牌菜啦．
還有一些小飾物，不過沒有興趣．
咁好太陽梗係曬魚乾啦．
對上一次來大澳又有搭棚做大戲，今次又係，唔通佢地成日做大戲
．
大澳現在有啲艇仔載人出海同係水鄉入面行駛，$20一位，佢地話有海豚睇．
轉了一圈後就去食飯啦，今日的菜色當然要道地啲，椒鹽鮮魷配啤酒，海蜇拼墨魚餅及蝦膏炒飯．
食完都差不多三點半，個陽光照射角度都幾好，於是就行出去舊碼頭啦．我倆研究咗一陣，一致認為圖中白色的一座三層村屋是傾斜的．
沿途都有好多工人做蝦膏，不過多是曬同發酵的階段，磚仔就得幾舊．
我始終覺得舊碼頭比較美，向著珠江口望日落會有一番情調，如果天朗氣清的話是可以望見珠海及澳門的，但係老人家比較滋陰，唔想曬（其實都曬咗大半日），於是就坐咗係樹蔭下的石堤上吹海風．假如今天是星期六，就一定會係呢度睇埋日落先走．
訂閱：
文章 (Atom)