今早晨咁早去咗做gym,之後去街市見到有啲羊膝賣,用洋蔥、紅蘿蔔、月桂葉、蒜頭及紅酒醃四個鐘。
由於依家乜都冇,用一隻辣椒、茄膏、罐頭及新鮮蕃茄去燜一小時四十五分鐘,再加一罐紅腰豆,夠兩日食啦。由於羊膝有大骨頭,所以用雞湯都可以有好好的效果。
同場加演土耳其無花果,不過有一隻好生。
唔想攞部dslr出來影,手機影啲相係咁上下。
------------------------------------------------------------------------------------
正常的做法:
羊膝八件、洋蔥一個切大塊、紅蘿蔔一枝切大件、月桂葉兩片、蒜頭數粒連皮略拍及紅酒半枝至一枝(視乎容器大小而定,最好蓋過材料面,唔係就要成日反來反去)醃過夜。
將蔬菜、羊膝及醃料汁液分開。用少許油起鑊,放入瀝乾的羊膝,加少許鹽及黑椒碎,煎封後盛起。用少許油炒蔬菜至乾身,加入一隻乾辣椒及蕃茄膏半小罐,炒香後再灒烈酒,加入一罐罐頭去皮蕃茄,醃料汁液及約相等或三分二醃料份量的上湯(雞湯),加少許鹽、黑椒碎、乾迷迭香一湯匙左右(可以用其他重味香料代替或混合使用)。燜一個半小時後試味,然後加入一罐去水的紅腰豆。再燜煮多廿分鐘左右,加入去皮去籽的鮮蕃茄粒,多煮五分鐘便完成。
(蔬菜可加入小許西芹)
註:由於啲汁太好味,所以呢味餸食咗三餐,不過屋企冇香料,第二餐開始食到有少許膻味,第三餐啲汁就加咗十一月麥太係荷蘭帶返來的ground caraway seed powder,啲味即刻唔同晒,帶少許辛辣味更加開胃。