是日下午回家等人來整天線，結果換來一肚氣
，又睇下邊個冇好下場啦
，不過要做返啲功課先得啦
根據大廈公契，由掣房的分線器至家中第一個掣位的天線都係自己的，其他就係公家。由於樓齡都有返咁上下，電線老化係正常的事，裝修時冇意識到呢樣野，結果冇換到，不過問題都唔係出係呢度，因為我由掣房拉一條天線入屋都解決唔到個問題．．．
反正都買咗條線返來（其實我係預算換咗佢的），見有時間就拉過佢啦，之前新燈喉就試玩過，咁耐同舊的就未玩過，多年前建成的樓宇係用鐵喉的，日子有功一定會生繡，最驚係有利位就頭痕啦。打電話問之前的裝修師傅，佢之前講過拉得出來就一定可以穿返的，佢叫我用滑石粉加水來做潤滑劑，咁兩公婆就夾手夾腳一人一邊穿線啦。不過好景不常，穿了兩米之後就有阻滯，用呎一拉，吓
，屋門口都仲未出喎
，唔係咁對我呀嗎
．．．攪咗一輪，終於過咗第二個曲位．．．不過到第三個又出事啦．．．
老化咗的天線用死力係唔得的，係中間斷咗就麻煩啦（開頭的那一段已經比我拉斷咗，好在係係燈喉外，證明條天線真係老化得好犀利，換線的決定係正確的），要用陰力慢慢拉，不過掣房的出口位置有阻，條線槽根本唔可以比我發力，要用手指慢慢去拉，玩一陣力都冇埋，最後要用返廿年前學過的機械常識及玩帆船的見識，用絞輪的原埋去慢慢拉條線過彎位，其實我害怕用機械／槓桿倍力的動作，因為我早年曾經好輕易將M16的螺絲拉斷，上個月又拉斷一條M12，如果今次又．．．好彩最後都順利通過，之後的航程就非常暢順，係掣房入面空氣唔好要出來休息一陣啫．．．
黃色的那一條就係我拉的那一條天線，最後睇返啲呎數喉內原來有十五米咁多，講返比個裝修師傅聽都嚇咗佢一跳
。
接返埋個分線器，呢部份就完成啦，終於可以安心，攪唔掂老婆今晚冇電視睇就比人，檢查完拉出來的天線冇表面傷痕，而係屋內的訊號跟以往的都一樣，可以放心關門啦。
拉出來的天線，就係比呢兩個位玩死咗。
之後又將屋內的天線換埋，結果總共用咗整整一百呎線，而我之前亦只係買咗一百呎．．．六合彩又唔見咁準．．．講到呢度，大家可能有疑問係換唔換線的結果都一樣，咁換來做乜呢
，因為呢個係同佢地玩的其中一個條件，完成咗之後就可以開火啦。除此之外，模擬訊號係比前好咗，數碼的就量化唔到啦。一條工作咗咁耐的天線，始終有要更換的一天，只係時間的問題。
身心俱疲的狀態下當然唔會煮飯啦，早日係長聾彎吉ｘ島買野時送咗一張海港的燒鵝贈卷一張，又見積西加小姐話佢都幾好食，開咗咁耐都唔幫襯返一次都唔係好比面啫。本來想早點下去，但係都係自己衰，要完成晒啲手尾先安樂，結果弄到八點先去到，大家都估到係要等等等啦。正常的我係唔會等位的
，不過一心要食的就冇計啦。
燒鵝例牌。四份一隻咁上下，外皮非常脆口，雖然仲差少少先有一樂的水準，但比樓下那間自稱燒味ｘｘ的太興簡直係高咗兩班以上。
豉椒炒愛爾蘭蟶子皇。78蚊四隻，真係街市買得最大的那一種，唔揀蒜泥粉絲蒸，因為自己都可以做得到。佢呢個汁用上金銀蒜粒、青紅細辣椒切粒、豆豉、蔥頭、蠔油、磨豉醬、火腿絲及上湯煮成。再加上少少紅黃燈籠椒，汁的味道幾好，只係個芡杰咗少少同啲蟶子汆水耐咗少少使肉質焾咗少許，鮮味依然係度，所以唔係神仙貨。
果皮蒸南非鮑魚。38蚊一隻，真係唔知去邊度可以買返呢個級數。肉質軟唔"鞋"口，有鮮鮑應有的鮮味，火候剛好。唯一問題係個汁有師傅係度，我都唔知邊間會唔落，唔點佢就冇事啦。
濃湯銀杏鮮枝竹菜苗。50蚊左右，食唔出有味精，個湯係上湯底，加瑤柱、蝦米、炸過的蒜瓣、大量銀杏、鮮枝竹、紅椒粒及菜苗弄成。
菠蘿桂花糕。好特別的配合，桂花糖水應該係加埋細隻的菠蘿一齊煮，菠蘿肉冇晒味，但個糕就有桂花混合咗菠蘿的香味。
總括來講食品的水準以呢個價錢真係抵食，要我係屋企複製返呢餐都唔會比佢平得好多。最重要的係佢下的味精份量係我可接受範圍以內，咁有心去煮中菜，香港都少見啦。
，解完凍啲腥味都幾難頂，用薑、蔥及黃酒汆水，再用蒜泥起鑊，炒軟翠玉瓜後加入日本青椒絲，拌勻後加入用桂林辣椒醬、蠔油、砂糖、老抽、生抽、味醂、生粉及水開好的芡汁，再將珊瑚蚌回鑊至汁液杰身後盛起。結果係三樣食材都爽爽爽。
。
