20100530的晚餐

今晚再返整香巴濃式煨豬肋扑排。

今次唔用西班牙黑毛豬，用美國帶骨豬扒就算。

唔記得拍一拍佢。

上少許鹽及胡椒就去煎，其他的都係正常處理方法。

今日玩咗好多牛油，見到牛油都有啲驚，所以焗時唔加牛油去焗香個面。

出來個效果有啲唔同‥‥‥

加啲沙律又一餐啦。

試爐日

今日落兩滴雨又停一陣‥‥‥

最好都係係屋企整野食‥‥‥

測試焗爐結果，爐中間開風扇時比焗爐溫度計低十五度，因為焗爐溫度計係最高的角位，所以量度出來的溫度會高一點，加上對流因素，測試用溫度計的量度點唔知係邊，我估係體內而不是在表面，十多度的差別在對流為主的環境下不是一個很大的差距。

客觀的測試做完，當然係要做啲實驗啦。

熔巧克力及牛油，加入蛋黃。

用KA打蛋白及砂糖，今次唔打咁盡，早少少收手。

將蛋白混入巧克力漿。

拌好。

入爐，爐入面個溫度好平均，右邊三個少巧克力蛋糕發起之後的高度好平均（冇相睇）。

加自製楊莓醬做甜點。

大的一個巧克力蛋糕就加糖霜。

另外又整咗啲打電話問配方的雲呢拿及咖啡味曲奇，好耐冇喞花，喞得唔係咁好。

20100529的晚餐

早日用剩的青衣魚柳，上乾粉炸好之後，加一罐粟米茸，炒多碟芥蘭又一餐啦。

20100528的早餐

昨夜煮好的魚湯今早用來煮新竹米粉，加幾片扎肉。

20100527的晚餐

今晚買咗條三斤的青衣返來，起好兩片魚柳之後啲骨就加埋上次留低的魚骨一齊煲咗個魚湯底，明早就可以整魚湯新竹米粉做早餐。一半的魚柳用來煎，只係上鹽及胡椒粉用不鏽鋼鑊煎都冇問題，易潔鑊的需求又再降低，即係唔洗買。半邊魚柳再分一半煎比較容易煎平魚皮個面，炒多少少芥蘭又一餐啦。

20100525的晚餐

今日放假一天，但係又瞓得唔好

整好個焗爐之後，個人都好攰。冇乜心機去試爐溫，新開張冇理由整到佢成身油，都係搵啲比較乾淨啲野試下。屋企仲有啲腰果，出完水之後就入焗爐試不同的溫度去焗走啲水份同埋整脆佢。初步感覺個爐溫比上一個好似低咗少少，不過呢個爐個火力仲大咗五百瓦，可能係錯覺啦，或者有時間搵個溫度計去試一試先。

唔想午睡，因為未來幾天都好多野做，攪亂咗個生理時鐘就好麻煩。

今日好好太陽，又唔熱，最好係去行山的。

一早預備好啲羊膝，用雜菜及紅酒醃咗大半天，今次唔落蘑菇，只係加咗一隻茴香。用蕃茄加牛湯底用慢火去燜二個鐘。

炒多碟芥蘭又一餐啦。

再見

我使用的第二個焗爐，不過壽命比第一個仲要短。係呢五年十個月裡，妳帶比我倆好多歡樂，辛苦妳啦，每星期最少開三日工作，現在可以長休。

因為妳的繼承者已經送到。

同時也安裝妥當。

仲有一大堆說明書要睇‥‥‥

不過十七本當中只有一本有用。

初步清潔進行中‥‥‥

低焗溫測試，主要係要將啲出廠味蒸發走，之後就會用中高溫將啲焗盤／架燒乾，最後就會測試個燒烤功能。

20100524的晚餐

是日做到天昏地暗，上午外出，下午返來又開會，整日都冇坐過係個位度。

今晚好簡單，食埋昨日的蟹餅，三杯韓國雞髀菇及蒸水蛋。

20100523的晚餐

是日一早出去濕平，瞓得唔夠，下午返屋企又眠一眠。

之後去街市都係冇乜特別野賣，見有一段時間冇食蟹，就買咗隻一斤多少少的泥蟹返來。

呢隻係我買咁多年羔蟹以來最靚的一隻，頂肉又爆羔，仲有少少重皮。

蟹身蒸至八成熟拆肉，加入洋蔥、芝士、麵包糠、麵粉、蛋、蟹黃及薯茸後半煎炸至金黃色。

另外用ＸＯ醬炒多一碟甜豆又一餐啦。

20100522的晚餐@金寶

為咗減短哀悼期，今日下午出咗旺角行一圈，最後搵到個代替品。

天氣太熱，行咗去安安睇下減價有乜買，見人山人海都冇乜心機行。

返到屋企附近的吉Ｘ島又買唔到餸，最後去咗九龍城食越南野。

例牌會食的醬爆蝦丸。

豬皮肉絲撈濛，普通撈濛一個。

炒明星菜，材料大細不一，唔係咁好食。

順化牛腱豬手湯濛，個湯底依然咁足料。

2010佛誕四維走

今日四出哀悼個焗爐，點知好多舖頭都唔開‥‥‥

去到祟光，人山人海，原來係減緊價‥‥‥

買咗啲咖啡豆、奶及一啲日本蔬菜，行多兩行又成身汗，返屋企沖個涼，休息陣又入TKO‥‥‥

今晚的晚餐都幾簡單，係吉Ｘ島買咗啲美國大石蠔，買五送一，我揀完十一隻後都揀唔到啦，不過佢賣五送一就冇理由唔揀多一隻（最近個盒最細個隻）‥‥‥

係土瓜灣街買唔到合適的游水蝦‥‥‥

今後主要食蔬菜：大和芋、日本紫蘇、沖繩苦瓜及帶子天婦羅‥‥‥

炸完出來冇乜顏色，最上面的就係大和芋，而下面白色的就係帶子。沖繩苦瓜切薄片來炸個味道好甘香，起初以為紫蘇葉好難炸得挺，但係原來佢就算叠埋咗都會自己打返開的，急凍刺身帶子炸完放耐啲都會有少少瀉水，反而用新鮮的就唔會有呢個情況。食時配喜瑪拉雅岩鹽。

仲有公仔咖哩角。

入到來係沈痛哀悼個焗爐，當然係搵野來焗啦，不過咁急要去搵野焗都係冇乜選擇‥‥‥

於是就整咗兩隻釀法國春雞，整法材料跟之前釀鵪鶉的一樣，不過就唔記得落松露醬，個味就差咗啲啲。春雞啲肉比鵪鶉少了一份野性，同一樣的餡料都係釀鵪鶉比較好一點。

上咗楓糖再燒個面靚晒。

終於見到個餡啦。

啱啱睇到啲九十後好多都唔識照顧自己，著鞋戴手錶都唔識，有啲食野仲唔識去骨，好大個都要阿媽幫去地去晒骨先可以自己食。

。

ＸＯ醬炒椰菜，冇相

。

C小姐的咖啡芝士蛋糕。

今晚啲餸菜乒乒肥肥都有份食，另外就加多一份帶子枕椰菜芯松露醬意粉。

。

20100520的晚餐

是晚收工去咗掃街市，本來近來都冇乜海產賣，加上休漁期就更加冇野賣。

見有啲細鮑魚，就買咗兩份返來，不過就真係洗餐死。最後整咗椒鹽，用來當送酒小吃就一流啦。

另外焯咗碟菜花，用之前煮好的茄汁燴扁意粉又一餐啦。