20110730@TKO

乒乒瘦了，係時候又要補一下。

係城市超級見有冷藏法國鴨乙隻，二話不說就買下來。法國家禽比較多毛，拔極都拔唔完。

大部份跟藍帶的處理方法，只是鴨腔用上鹽、黑椒粒、蒜泥及生抽去醃。

今次將翼尖及尾去掉，再用綿線扎好，再上鹽花去焗。先用180度高溫烤鴨背再反身用160度去烤，最後加大火烤好個面。唔係趕時間可以再烤多一會，個胸皮就會更加脆口。

照例中式切法，橙肉伴碟，橙皮就蜜餞。

醬汁就先將50克煮成焦糖，加50毫升白酒醋開稀，加250毫升無果肉橙汁及500毫升雞湯（因為冇小牛湯），再加一個橙皮茸，煮至三份一左右備用。烤好的鴨盛起，鴨汁去油再炒一個洋蔥及一條紅蘿蔔（一厘米大小丁方），加入濃縮好的橙汁，煮十多分鐘後隔去渣滓，汁液加入一湯匙橙皮果醬及適量的橙酒，鹽及胡椒調味。［蔬菜如果早一點煮會更出味。］

橙皮先用熱水煮一分鐘盛起，再煮糖水用慢火煮半至一小時。

白蘆筍伴蛋黃醬加日本烚蛋，始終現成的蛋黃醬欠缺一點鮮味，下次要自己打個蛋黃醬先得。

炸物時間，先炸日本南瓜及沖繩苦瓜。

再炸本地有機山芋及日本青椒仔。

最後炸木棉豆腐，另外一盒日本青椒仔就用焗爐烤。

今晚應該飲啤酒的。白飯繼續冇人食。

再來係煮車厘子時間，都唔知有幾耐冇煮過。放火‧‧‧

伴雪糕吃。

 

20110725的晚餐

早日係大埔買咗幾片美國豬扒，今晚整返個焗豬扒飯。

唔知點解今日個廚房越煮越熱，先來個炒飯底都炒到成身汗。煮埋個蕃茄汁就真係人都癲。煎埋幾片豬扒加啲芝士就入焗爐。炒多碟菜又一餐啦。

20110724的晚餐

今晚炸炸炸。

買咗啲南瓜、沖繩苦瓜及豆腐，再加啲蘆筍來整天婦羅。

係街市又見到啲蟶子，用三杯煮法。

 

 

20110723的晚餐

今日行大運，先去天水圍探貝貝，不過佢瞓覺唔出來。

之後去元朗食甜品，最後去大埔買餸。

休漁期都係冇乜得揀，買份鮑魚仔返來做椒鹽。

夏天好鍾意食蕃茄煮的餸菜，今晚煮個蕃茄火腿蛋，加碟炒潺菜苗又一餐啦。

 

20110720的晚餐

一隻燒雞二個人一餐食唔晒，第一餐通常都係食髀翼，第二餐就將雞身拆肉煮來吃。

今次就加啲白汁、洋蔥及蘑菇焗意粉。

夜返冇菜賣，得啲白菜仔，用雞湯煮。

 

 

20110719的晚餐

今晚食燒法國白油雞，加碟蒜泥炒絲瓜又一餐啦。

 

20110717的晚餐

去咗九龍灣行冷氣街，最後買咗啲日本黑豚及芝士返來。

塊豬扒好薄（每片得四両），用刀片開中間（唔係相中的小刀，唔知點解就手用咗把八吋刃的西廚刀），再加入用小刀片的芝士。上粉、巴馬火腿片、蛋漿及麵包糠。

另外加幾隻焗荷蘭蘑菇，意粉就拌以上餐食剩的黑啤羊醬汁。

20110713過大海

開完會，睇完地盤，又係食晚飯的時候。氹仔的一間葡餐館。

燒魚。

鴨飯。

非洲雞。

20110712的晚餐

今晚食埋昨晚用剩的蝦湯底，繼續都係意大利飯，不過今晚就用上蘑菇，炒少許荷蘭豆，再煎多塊安格斯Select級牛扒。

20110711的晚餐

早日食完加拿大牡丹蝦刺身，廿四隻蝦頭唔知做乜好，最後煮好個蝦湯底，加急凍海鮮煮成意大利燴飯，炒多碟雲耳絲瓜又一餐啦。

20110710的晚餐

今晚簡簡單單，煎二個節瓜，蒸半打貴妃蚌又一餐啦。

20110709@TKO

天時暑熱，冇人想食肉類，咁就整下冷盤啦。

做冷盤功夫多過煮大舊肉。

現在的芽菜好長身，搵唔到以前的短肥品種。

買完銀芽都係要跟多一次，如果夠時間都係買返芽菜返來摘會經濟一點。

芝麻醬拌青瓜素雞。

煎蛋餅，切完咁多樣攰得滯，比老婆煎。

縮水縮到嚇死人的海蜇頭，下次都係要去返上環買。

自家調製的麻醬及泰式沾醬。

越式蟹肉芒果卷。

第二輪的魚生飯，本來係食手卷的，不過唔記得買紫菜。

日本帶子。

加拿大牡丹蝦。

冰凍涼粉，法國蜜瓜，舊鄰居係鄉下摘的荔枝及台灣芒果。

 

 

20110703的晚餐

一早起身打完網球，都有一段日子冇打過啦，休息時間多過打

之後就去超市補貨。

好耐冇食的納豆長芋拌飯。

炒椰菜。

煎蝦卷及豬肉卷各一條。

主角當然係巴馬火腿配蜜瓜來吃啦。