2008最後一餐晚餐

今日去買咗啲臘味返來，當然係襯新鮮熱騰騰時整來食啦

拖一拖啲臘味就切件放入煲入面。

有臘味煲仔飯食當然有薑汁炒芥蘭啦。

Happy New Year

 

 

08年最後一餐lunch

今日同大小姐去咗Applegreen食lunch。聞說呢度好難訂枱食晚飯的，今日下午去到都見到好多留位牌，呢度主打係食美國菜，沙律係佢地個主打。因為去到冇其他人食緊野，所以唔知啲沙律有幾大份，最後叫咗半份野菌沙律試下，點知細食啲都可以當主菜。啲沙律又真係幾好食的。

新奧爾良海鮮包？(唔記得個名)。蒜蓉包伴碟，佢最大的特色係用膠袋上枱，跟係街市買完海鮮冇分別，內裡有燒過的粟米，海鮮有蝦、魷魚、蜆及青口，主要係用魚/海鮮湯底加入辣椒、黑胡椒碎、檸檬、西芹、蒜泥、洋蔥及雜香草等煮成，至於個湯汁整到紅色就估唔到啦，佢話係Cajun spice，不過我未用過唔知係乜。除咗隻蝦過咗少少火同冇咁新鮮（雪蝦係咁上下啦）之外，整體都配合得幾好。

蘋果酥(apple green crisp)。個雪糕幾好食，有鮮雲呢拿的香味同個雪糕都好滑，不過用來配搭蘋果酥來吃就份量小咗啲。個皮都夠鬆脆，不過牛油的級數差咗少少。至於中間的蘋果就煮得硬咗少少，真係好少，同埋啲肉桂味唔夠香。

其實餐牌係有意粉同其他扒類揀的，不過自己都煮到的就唔會食，係要試啲新奇野先至好玩，不過唔知大小姐係唔係想食呢

20081230的晚餐

食咗兩晚隔夜餸菜(羊肩、豬肋骨及肉醬)，今晚又可以煮返啲新餸菜食吓。

油醋沙律、煎鴨胸伴車厘子汁及上湯炒椰菜。

今次個鴨胸先煎皮等出咗大部份油之後，再略煎硬肉個面，然後用一百四十度焗七分鐘，個汁就用紅酒起底，再加車厘子果醬煮至收汁。

20081228

今日又開始準備啦。

已完成牛蒡、蒟蒻、冬菇、竹筍及蓮藕。

原來屋企冇晒盒。

20081227@TKO

整咗一堆湯底係雪櫃，攪到個雪櫃冇晒位，要清少少先可以儲返啲食糧。

最快方法當然係煮辣肉醬啦，買咗成條紐西蘭西冷，頭尾因為唔靚仔而煎唔到扒，通常都會用來煮肉醬。又切咗一個鐘頭，切到尾條頸有啲酸軟，攪到啲牛肉切大粒咗。

玩完肉醬又入咗TKO，今晚又係集體創作，有蝦丸當然有冬蔭公湯，買回來的法包、烤雞翼、生果沙律、吉列豬扒、羅馬生菜、咖哩雞、煙三文魚及辣肉醬。

甜品就係椰青大菜糕。

相關網址：

遲來的聖誕大餐 ~

12272008聖誕大餐

20081226的晚餐

今晚係SNG廚房第一次開爬地，慶幸地可以係七點半準時上到第一輪菜。

先來頭盤幾度先，大蝦芒果沙律。昨日去咗灣仔入貨，買咗啲沙地阿拉伯的雪蝦，用菜湯煮完再用冰水急凍去殼去腸，芒果用咗澳洲的蘋果芒，因為菲律賓的唔夠靚，沙律菜都係用紐西蘭進口的比較有信心，底汁用上日本的柚子醋，面的當然係他他汁啦。材料下午一陣就攪掂，夜晚攞返出來排列就得啦。

吉ｘ島的魚生。

小食數款，醬油冬菇早幾日已經煮好，西班牙黑毛豬腸切薄片，日式玉子卷都係第一次用雹磁爐煮，已經掌握到個火力大小，不過要分心整其他食物，整得唔係咁好樣。

今日一早就買咗返來的湖蟹，用鹽水煮至蟹殼變色就拿起，跟住就拆肉，咁樣整啲肉同黃之後煮都唔會煮得太老身。

比佢玩咗幾日的鈎翅，十一両發起應該有廿両。

爆香蟹黃之後加入蟹肉煮熱，注入熱上湯後再加入煨好的翅，用馬啼粉水埋芡。

色就唔係咁好，不過個蟹鮮味好突出。

整返個中式豬肋骨啦，用叉燒醬、海鮮醬、洋蔥碎、蒜泥、蜜糖、豉油、茄汁及玫瑰露等醃咗一晚，去清醃醬後先烤骨的那一邊，再烤另外一面至熟透，再塗上醃汁加蜜糖大火烤至起色就完成。

半年有多冇整過的黑啤燴羊肩，今次唔用酥皮改用鋁紙蓋面入焗爐。

有呢味餸當然要有白飯送啦。

砵酒焗蠔。桶蠔用生粉洗淨，先用菜湯略汆至表皮收緊，抹乾水份放入雪櫃備用。上薄生粉用油煎至脆面後盛起。爆香薑片、蔥白及蔥頭，加入糖、蠔油及水混合好的汁料，將蠔回鑊，加入砵酒後立即蓋上約一分鐘。

呢味餸係煮咁多次最成功的一次，味道亦都係最好的一次，因為老婆攞咗枝三十年的砵酒比我煮，一落鑊個陣個味已經嗅得出有所分別，以為係十年個枝，點知

上湯炒塔菜。先用薑片起鑊，加入塔菜後炒至熟透，最後加糖及魚露調味。

甜品又係火焰車厘子。不過今日轉用蜜桃汁代替楊梅醬，今晚整的餅皮夠薄啦，不過煎成十五塊都幾花時間的。

 

20081225的晚餐

昨晚食得太多，今晚都係簡單啲好，炒飯加甜豆炒斑球又一餐啦。

仍然控制唔掂個爐，炒飯個樣唔好，不過味道都可以。甜豆先汆水去豆青，斑球先用鹽、胡椒粉及生粉略醃，跟住泡油至六成熟左右。爆香料頭，加入甜豆至熱透後再將斑球回鑊，用糖及蠔油開少許水調味。

20081224的晚餐

是晚聖誕夜，一於試下將SNG廚房全力開動會係點。

先整一個洋蔥湯，個法包本來發得好好的，但去到夜晚由於要幾樣野一齊做，結果最後一次發得唔好(應該係溫度唔啱)，冇上次咁好食。洋蔥湯就係正常個種，因為個湯底之前已經整好咗，由於依家屋企啲香料唔齊，味道有啲唔同。

煎匈牙利鵝肝配意大利黑醋汁(冇影到)，正常水準。本來想整車厘子汁的，但係有啲廚具用唔到，唔整啦，簡單就算。

聖誕例牌都係開返枝香檳(唔係sparkling)啦。

英式炸魚，用咗三斤重的芝麻斑做，今次個漿用返健力士開，開得好靚(應該係開呢個漿最靚的一次)，但係個油溫攪唔掂，迫唔返晒啲油出來，油咗啲。今日調返個他他汁，去咗三間超市，兩間大瓶裝做特價的都賣晒，我估又係阿蘇的傑作，咁整住枝細用住先啦。

基本上以上三樣野已經飽咗八成有多，不過既然玩得咁過癮就一於玩埋落去，整返個好多年冇整過的火焰車厘子。屋企買咗枝打火機，都要試下點唔點到來玩先得。先用牛油煮半個檸檬皮及一湯匙的黑糖，再落二大匙自家製的楊梅果醬(其實係之前整得酸過頭，用來平衡個味道就一流啦)，煮開之後就加入鮮去核切半的車厘子，再加入二大匙的拔蘭地，然後放火，熄火後加入一湯匙意大利黑醋，煮軟車厘子之後就加入二大匙橙酒及半個檸檬汁。〔右下方紫藍色的就係火焰啦〕

之前買咗個crepe鐵板終於可以剪綵啦，不過仲未掌握到點整得好個圓形。

完成品。

戰後廚房，已經洗咗幾輪都仲係咁，不過要洗晒都好快啫。

完成品的水準得返之前七成左右，原因都係唔慣爐頭的火力及時常要四維搵東西，如果有個assistant係度就好啦。

是晚食品全部由原材料開始做的：牛湯底及楊梅果醬就之前整好，法包、炸魚粉漿、他他汁及crepe的粉漿都係今日做的，雖然效果唔係太好，但對個廚房又認識多一點啦，兩日後再整大餐時希望唔會咁手忙腳亂啦。