自家製鹹蛋---第一回

睇咗呢個醃鹹蛋方法好耐，一直都想試下整幾隻來食，始終係醃製食物，淺嘗就好，太多就唔係咁健康啦．最近(其實都係幾星期前)父母又從鄉下帶咗一批鵝蛋回來，以往啲蛋都會做蛋麵又或是煎熟就食．通常帶回來的鵝蛋有三種，一種係初生蛋，即係頭幾次生出來的蛋，由於啲鵝未成熟，蛋殼的厚度唔係好平均，加上蛋白多蛋黃少，最適合做麵，彈性會比用雞蛋的高，但蛋黃的味道就一般．第二種係未受精的正常鵝蛋，呢啲係鄉下都係唔值錢的東西，因為賣鵝仔的利錢比蛋高好多，所以都係大量供應，不過個蛋黃就超大，蛋白就好少，要加雞蛋白才可做麵，但蛋味就好夠．第三種係孵唔出的鵝蛋，對我就冇用，我母親以前就用來驅風．由於鄉下人特別熱情，開一句聲就幾十隻咁比你，唔夠的話比幾箱你都得，老人家拉到手都軟，於是近來都只係要十隻八隻初生的就算啦，包好放雪櫃一個月都仲係好新鮮．唔講大家可能唔知，我們常吃的中國"鮮"雞蛋其實都唔知放咗係雪房幾耐，不過保存得好係絕對安全冇問題的．

中學的實驗時間又開始啦：

洗乾淨啲蛋s，抹乾及吹乾待用．

二百克鹽原來咁多．跟住就用一升水煮沸加鹽拌勻後放涼．呢隻係海鹽，冇乜經過過濾，所以會有好多雜質．首先要去泡，再用濾紙去沙泥，有啲係沙灘玩泥沙feel，手有鹽分冇影相．

跟著將鵝蛋放底，雞蛋放面，方便拿出食用．

加入已放涼的鹽水及高度數中式白酒便完成．

Related Links:

@牛媽媽

@Carlo

自家製鹹蛋---第二回