20071216家庭同樂日@大球場

上完加山一段路,啲燒烤都唔知去晒邊.要加碼先掂...半隻熱狗就補返今朝個份早餐.

一望個背景,咁似山頂纜車個標誌

哈哈,又係去聽Sam Hui的演唱會.呢次又係我第一次去大球場聽演唱會.由於一行六人,要真係睇得清要坐到台前...成800蚊一張飛...坐遠少少都係睇唔清就不如坐到最遠啦.

演唱會開三點,不過由於入場慢,要三點三左右先入咗一半人,阿Sam跟住就不停咁唱.

唱足一個鐘先由佢細仔出來rap.

跟住當然有個Sam Hui演唱會個膽出場啦,許冠英.之後又有廋澄慶,仲有個徒弟Justin??

入場派咗張有藍天背景的歌詞.

成個台日間睇就冇乜吸引力.

中途當然又有同觀眾握手時間啦.

東西看台中間架Buggy仔全速前進,後面啲工作人員就...最慘係攝影個兩位,仲未入鏡.

由於五時半前好大部份都係英文歌同舊歌,都走咗一部份人.但係佢地唔知個戲碼依家先出場.今日嘉賓都好多,有佢兩個仔啦,Soler,世榮同貫中,幾驚壓軸係家...

入夜啲燈光效果開始出來啦.

仲有入場時有啲光纖棒.

再黑啲又可以玩多啲.

依家好似放煙花係拍定動作,當然比紅館高好多啦.

演唱會七時十五分結束,唔講都唔知唱咗66首歌.

後記：今次個台開得唔好,太過偏埋一邊,又唔可以用晒個草地好似外國個啲咁,不過就算係都唔會有好多香港人會企足咁耐啦.如果可以係中圈開四邊台相信個觀賞效果會好好多.但係咁開法應該係想將啲音量向晒南華會個邊,等山後個啲豪宅唔會超標.同時啲rock都放係六點前,接近七點就慢歌多啲.玩到七點二都有點走環保例的灰色地帶.最後個通利啲音響都OK,但係大球場本身套JBL Array Speaker就有啲問題啦,唔知係唔係個control訓咗覺.

相關新聞:

星島,明報.