要明白Pivot Point，第一樣要明白的概念就是視差，最簡單的方法就係分別用左右眼去看一啲近的景物。雖然左眼同右眼所看的物件是一樣，但所見到的範圍有少少唔同，而呢少少分別就足以使大腦可以將二維映像立體化，從而判斷距離。不過呢個現象係全景拍攝係一啲唔想出現的東西，要令所有照片都從同一個視點拍攝，否則連接點就會出現偏差，又或者要用軟件去修正，從而使相片的整體表現不理想。
之前都提過拍攝約十二呎以內的景物就要做Pivot Point的修正，呢個數字都係一啲約數，唔係一啲金科玉律，有個概念就得啦。其實個距離跟鏡頭的焦距有關，廣角就遠一點，而望遠的就近一點。如果大家明白及知道相機的Pivot Point在那一個位置，就算唔用腳架都可以拍一些近的景物。而我最常用的方法就是用手指放在穿越Pivot Point的中軸上，拍攝時相機依著手指尖轉就會有好好的效果了。
大家在別的網站介紹全景相時可能會見到"Nodal Point"呢個名字，呢個字係光學上有別的含意。一個Thin Lens Model就只得一個Nodal Point，而呢個位置亦都係Pivot Point。但一枝鏡頭是由幾塊鏡片組成，會有兩個Nodal Points，將Pivot Point放在是但一個Nodal Point都做唔到想要的效果。另外有啲人會建議將Pivot Point放在光圈葉的位置上，但實際的測量又會有少許偏差。理論歸理論，行動最實際，搵到個Pivot Point就懶理佢係邊個名啦。
要搵個Pivot Point其實好簡單，只要將相機架在裝有全景拍攝架的腳架上，先將鏡頭中心點調節至穿過雲台的轉軸上就完成第一個步驟。
跟著就架設好兩枝垂直的物件，今次用上兩枝醬油。然後就將相機放到合適的位置，使三者接近一直線。這時就要調較好相機的水平，以及各項光圈、快門及對焦點的設定。
將相機轉向，直至垂直物件在相片邊緣的位置上，拍一張照片。
再將相機轉至另一邊至垂直物件在相片邊緣的位置上，再拍一張照片。
檢視兩張相片上兩枝垂直物件的相對距離，如果是一致的話就完成啦，否則就要將相機的位置前後移動再搵過。記下相機在全景架上的位置及相機的焦距，下一次用跟著調就可以啦。
如果用上單鏡機，在閃光燈接點上可以網上水平儀來控制相機的水平狀態。
待續．．．
犀利啊
回覆刪除[版主回覆03/18/2009 22:01:00](Empty)