20090314家常便飯@TKO

天氣咁好，本來打算四維走，點知外牆要搭棚，咁就冇叿半日啦，再去行山都唔去得遠，忽然C小姐來電問有乜玩．．．最多咪又係去佢屋企後面個五塊田囉，整埋啲曲奇都晏啦，唔去行啦，星期日先去啦。

食過辣辣午飯之後街市剛剛開返，有幾樣野可以買來玩：鮮雞、石頭魚及白鱔王。

冇野食就食雞，啲鮮雞好貴，要成48蚊斤，一隻都要過百，以前幾十就得啦．．．

石頭魚唔夠大條，四人吃要買三條，不過石頭魚骨大，買三條會有好多骨剩，骨煲湯就好靚啦，不過我係想食肉的．．．

一早去街市行的時候見到有白鱔係海水魚檔賣，冇標價冇理佢。下午去到見到有二條游咗過隔離缸同啲養老虎斑玩，跟住又同星斑玩，再同條海老虎斑及象拔蚌玩，最後跳咗落地下。呢種鱔啲色比較綠，比平時買的灰白唔同，要68蚊斤。揀咗條唔夠二斤四個人食都差不多啦。

是晚C小姐煲咗節瓜鱆魚湯(加咗豬骨及原粒瑤柱的)、鏞記的肝腸臘味飯、菜芯炒鮮牛肉及豉汁蒜泥蒸白鱔。

條鹹水鱔跟淡水的不同，肉質比較結實，較爽口彈牙，食味完全唔同，油脂冇泥味。

用開電磁爐轉返用明火真係唔慣，炒完菜個肚熱到著火咁滯，啲脂肪比佢熔化晒．．．