近來因工作關係要影啲360度全景相片(Panorama)，其實之前都有影過(有啲劣作已經放咗係區區blog主頁的底部，不過相信冇乜blog友會睇到咁低
，仲有：手機影全景、又全景@青衣、全景@青衣、0626土瓜灣的早晨0615~0700)，大部份係得閒無聊時用相機／手機影幾張駁埋就算，好少相片會多過180度的。
襯有時間就寫低點樣影一張似樣的360度水平合併式全景相片啦，當然個中的技巧可以應用係其他全景照上。全景拍攝分好多類，有啲專用的器材可以一按掣就映完，價錢當然係天文數字啦，而普通人日常接觸的全景相都係用兩張以上的相片接駁而成。
例如由於地方太窄，一般相機的鏡頭好難用一張相映晒所有想要的景物。
用兩張在同一位置拍攝的照片，用軟件再接駁合拼而成一張照片。
如此類推．．．
至於全景拍攝的表達方式除了是一張2D的相片之外，也可以是互動的動態影片（最多可以好似球體咁水平360度垂直180度）。
工慾善其事，必先利其器，要拍攝當然要有合適的工具，不過平有平玩，貴有貴玩，明白當中的原理加上DIY就可以用一個低啲的成本去拍攝。最基本的當然係相機啦，就算係手機都可以，不過最好有對焦功能的比較好，用DC的話就最好有手動對焦及手動控制曝光。
映咗相返來當然要用軟件接駁，有一個好好用的免費軟件叫Autostitch由Matthew Brown所寫的，免費版當然有少許功能上的刪減，不過一般的使用已經足夠有餘啦。佢最大的好處就係全自動，當然有少許基本的參數可以使用，例如輸出相片的大小、旋轉輸入的相片以及相片的質素，設定的版面非常簡單，唔明的唔需要明，明的就自己去設定
。
由於佢本身的自動化功能已經寫得好好，揀好相片之後就算相片的水平唔係對得咁好、曝光有少許的差別等等，都可以一一自動校正。普通的用途係軟件本身的網頁都可以看到。呢個世界冇免費的午餐的，太大張及太多的相片係接駁唔到
。
要接駁一張好的（180度以上）全景相片，有兩個基本的要點要知道，第一就係水平，第二就係Pivot Point。水平大家都好容易明白，只要有水平儀的幫助，裝好相機係腳架上轉就可以；而Pivot Point就係一啲比較難明的東西，只要將呢點調較至旋轉的軸心，特別是景物包含有近距離(~12呎以內)的物件，拍攝出來的相片就好容易接駁成功。仲有一樣係兩張相片要有百分之三十至五十的重疊才容易進行接駁得好。其他的都是攝影基本功，例如：景深控制、對焦點、白平衡等等，唔詳細寫啦，不過曝光呢一環仲要花少少時間去研究，因為係啲不平均的高反差環境下，用一個曝光值去映晒一圈的相片會有啲問題。
水平呢一點為什麼咁重要？主要原因係買少見少，係上面的一張相中，大家可以見到在接駁的過程中，相片會有"損耗"，當一張相高，另一張低一點的話，得出來的相片如果要裁切成無黑邊的長方形會"矮"了不少，相片越多，效果越明顯。
Pivot Point是拍攝全景的核心，抓不好就接駁得唔好。簡單來講，每枝定焦鏡頭都有一個Pivot Point，而變焦鏡就在每一個焦段都有一個，所以用變焦鏡的話，最好使用變焦範圍的兩端。一般鏡頭的Pivot Point都在光圈葉的位置中央，但現在的鏡頭設計越來越複雜，有些變焦鏡的Pivot Point會偏離呢個位置的。三言兩語好難講得完點搵呢點出來，有時間再寫啦．．．
以下係區區最近的劣作，係用第二個功能更強的軟件去接駁（其實只是可以自己調節吧了），由於要肯定接駁順利，一圈映咗十五張相，原相好大張（~18500 x 3900 pixel），縮圖至1600 pixel左右。
仲未搵到點Embed Quicktime Movie入Yahoo Blog入面，想睇QTVR版就要Click入以下網址睇：http://www.fotop.net/albums2/SNG/QTVR/MorsePark.mov （要等一陣才完成下載）
不過要裝咗Quicktime Player先可以看。
待續．．．
[quicktime]http://www.fotop.net/albums2/SNG/QTVR/MorsePark.mov [/quicktime]
沒有留言:
張貼留言