人日晚餐@半島豪庭

今晚走咗去十二月麥太個廚房倒亂，冇時間影相，要去十一月麥太處借(唔還個種),菜色都係之前整過個啲，冇乜新野玩．

蘆筍煙三文魚卷，十二月麥太製作的．高湯煮筍，買唔到冬筍，用咗日本個隻包裝筍，唔係咁好食．

蘑菇忌廉湯(冇相睇)，自己煲咗個菜勁西芹湯底，加啲洋蔥蘑菇忌廉打成，唔記得臨尾加啲酒落去，所以個味差咗啲．

肉醬意粉，由於抽風唔係咁好，所以唔夠膽炒香啲牛肉同茄膏，個肉醬唔係好夠身．

烤焗羊架，好耐冇用啲細焗爐，呢個係高智能多功能微波蒸氣焗爐，我呢啲低B人當然唔識用啦．個火數細咗啲，時間比屋企個大焗爐要多一半時間．今次隻羊焗得幾嫩滑，因為出來用咗鋁箔去保溫，用餘熱燜熟個心的位置．

自家製薄餅，發完冇排氣，變咗麵包底．自家製蕃茄底，加咗啲乾蕃茄，菠蘿，黑橄欖，salami，新鮮Basil，同埋pizza芝士舖面．

南瓜西米露，十一月麥太製作的．唔知係唔係佢念念不忘啲超濃縮燕窩，啲西米好多好多呀，南瓜露唔夠滑口，過一過篩會好啲．

同場加演，新版Sangria，用橙酒，紅酒，French Lemonade，Ginger Ale及生果．

Cooking Demo完畢．

～嗚謝～

場地：十二月麥宅

攝影：十一月麥生