20080525的晚餐

今日食完晏，冇乜野做，又走咗去Apita行下，睇下有乜新野，玩咗一輪，結果又係買咗魚生返來吃．臨上船前去咗買十三座牛雜食，之前行過好多次都冇買過來吃，今次老婆話要食就買一小碗來吃啦，對上一次吃街邊牛雜都可能係廿年前啦，之後都係係麵店食多，感覺跟街邊食啲唔係太相同．買完剛好有船，坐低就即刻開餐．牛雜的質感偏腍，個汁好"厚"身，但係冇晒香料味，應該係翻煲咗好耐，但係又冇補返啲香料去提返個味．咁多樣係個牛膀鞋口啲，其他除了腍了一點都可以．有時唔係個汁膽越耐就越好的，要不時添加返啲新鮮香料先會好食，唔係就會攪到個汁好死．

買咗個新煲當然要試下有冇問題啦(呢啲德國高科技煲點會有問題呀)，先係用之前儲落的冬菇蒂煲咗個清湯，再浸發好乾冬菇，乾草菇，牛肝菌乾，蒸透蠔豉，一小塊蒸熟的火腿，切好鮮蘑菇及少許干貝仔來燜呢個餸．

先爆香啲薑片，蔥頭及蒜頭，再下所有材料(除咗火腿及蠔豉)爆至乾身，贊酒，加湯，加入餘下材料，少許蠔油，冰晶糖及少許海鹽．燜好後再少許麥芽糖，黑豆豉油及晒油調色．

由於浸菇啲水加冬菇上湯，火腿及貝仔已經好夠味，所以最後都唔洗點攪個汁已經可以啦．啲蠔豉係剛買的，好好味．

冇野玩，玩下crossover，法德兩個死對頭玩互換都幾合身