20080511的晚餐

今晚食埋啲下欄野，昨晚條牛柳裁出來的牛肉整咗個中式蠔油牛肉．裁出來的牛肉當然冇中間個部份咁好，有少少散的感覺，炒的話可能會散開，於是就漿完後泡嫩油，再爆香薑片，洋蔥，蔥頭及蔥白後將牛肉回鑊加調好的蠔油汁，最後加入蔥段盛起．

昨日整咗啲糟鹵毛豆，很好吃．話說毛豆本來煮熟放涼食用，但係在南貨舖同時買了糟鹵整醉雞，個老闆以為我整糟鹵毛豆，於是就教咗我整呢個餸啦．加咗啲凍豆腐及食剩的蘆筍又一餐啦．

昨日行開大眾，見到有兩本台灣出的麵包書都係共五十元，買咗返來就搵一個食譜試下啲份量準唔準．未學行先學走的我又搵個烏龜菠蘿來試下，冇菜油就用返牛油來整個菠蘿皮，屋企冇臭粉，所以啲皮唔會好似本地麵包店個啲咁鬆法，偏向墨西哥包個種口感．原食譜要用朱古力漿做眼睛的，但係冇理由為了十二隻眼睛做咁多功夫，於是隻隻烏龜都合埋晒眼睛．

一共做咗六隻，但係皮的份量就多了一倍，唯有留番下次用．

隻隻都係141~148克左右．個火大咗少少，下次要減啲溫度，四肢頭尾由於表面面積大一點，感覺上甜了一些，其他位置就剛剛好．