20080518的晚餐

昨日返大埔食下午飯，之後就走咗去同creamy玩，玩完當然又係食食食啦．

行咗大埔街市一轉，買咗啲海鮮返去煮咗餐便餐．

烤魷魚，條魷魚仲係識變色，即係死緊，返去將魚身起花再用包干燒明蝦醬醃完就燒都幾好食．

自家製PIZZA，用麵包機弄的餅底，加咗啲濃縮咗嘅放咗唔知幾耐的蕃茄醬，上面配青椒，魷魚鬚，新鮮basil，辣肉腸及芝士．個底都發得幾勁，變咗超厚麵包底，不過都有辦法變薄．

泰式蝦湯，本來有蝦殼剩可以整個冬蔭功湯，點知係超市買返來個冬蔭功醬原來係冬蔭功風的．要加啲檸檬同辣椒油先變成疑似冬蔭功．

蒜泥蒸絲瓜，用金蒜放面蒸完贊熟油．由於手腳慢，黃咗啲．

蝦餅，二斤海蝦整的蝦餅，都仲係整唔爽口，仍然唔知係邊度出事．

食完飯當然有甜品啦，呢個係非常容易整的涼粉芒果撈，都唔知點解依家啲生果可以差到咁，以往熟芒果一定甜，呢四隻都係得一隻叫做似啲樣，要加少少糖先合味．