20080426的晚餐 (updated)

今日一早終於有得做運動,打咗唔夠一個鐘頭網球,因為地下啲水氣比太陽蒸返上來,打打下都頂唔住,咁耐冇做運動都唔好咁搏啦.之後就去咗尖沙咀做護衛將啲聖火運往TKO,再將啲火種帶返土瓜灣,原來有成8KG咁重.

今晚都係家常便飯,整咗日本梅子燜法國鴨胸

個餸係參考江獻珠女士的食譜,不過冇雞湯,所以只用水煮,梅子就用返日本個隻及自家浸酒後的梅肉,啲法國鴨胸唔係咁適宜煮咁耐,用返大陸的可能會耐煮啲.由於法國鴨啲血味重好多,用返鴨湯會更合味,相反大陸的用水或淡味雞湯就可以啦.

"餓叮"

用三包木魚粉加一塊大昆布,再加一條中型日本大根煮成,今次個湯底冇落洋蔥都好鮮甜.係城市超級買啲日本魚蛋比吉x島的好食好多,當然價錢又係貴好多啦.

煎烤羊架

兩塊小羊架係C小姐個冰格拿出來的,用最急速的解凍方法解凍,抹乾後用雜香料醃一個小時左右就煎烤.一人食咗一枝,Bingo仔又食咗一枝.厚身個塊羊架個心就生咗少少,薄身個塊就剛剛好啦.

蒜泥炒椰菜

由於啲人傳完聖火都唔願再出去買餸,四分一個日本椰菜炒埋一小碟.

日本冷麵

個包裝寫一包就二人前,五人食買兩包都差唔多啦,點知發水咁多倍,包半都差唔多啦.食時加烤過的紫菜,芝麻及冷麵汁食用.