20080411的晚餐(updated)

有人新居入伙，當然係去搗亂啦．原本應該係星期六日去玩會方便啲，唔洗咁趕，但係主人家話未來數個星期六日都唔得閑，為咗滿足頭啖湯/頭注香的心態，星期五都照去搗亂．

早咗少少收工入去大埔街市買海鮮，六點鐘都仲有幾多得賣,去到魚檔兩位麥太非常興奮，因為太大同太多種類選擇啦，(其實朝早仲多，下晝已經少咗好多游水野賣)．本來打算買貝殼類，但見到好多好大隻的蝦，128一斤，唔係好貴，就買咗五隻差唔多有一斤咁重．上咗樓上買咗個榴槤，好耐冇成個咁買啦，隻金枕頭都唔錯，香味夠但唔會太腍．

大小姐秘製烤雞，唔記得買蜜糖，不過個皮都好脆(熱個陣)．

白汁芝士焗蠔，今次啲蠔好特別，一個殼有兩粒肉．

蒸帶子，用粉絲做托底，加金蒜，陳皮絲，辣椒絲去蒸．

豉油王大蝦，老人家唔識用個電磁爐同個生鐵鑊，點解隻鑊一邊熱一邊唔熱的，個爐一級之差就好大分別．初初以為佢賣得貴，點知一開邊原來全身都係蝦膏，個頭仲係頂肉同膏個種．全碟蝦都只係用咗好少豉油，因為個鑊底有少許燶，太多豉油會起咗個底的燶味出來，好在隻蝦本身都好夠味，唔落其他都調味都可以，不過應該冇人知我落咗成個湯匙的拔蘭地去焗佢．

Grill NZ牛扒，玩耐咗，唔夠熱．

灼芥蘭，成斤菜，好大碟．

冇影相的唔知幾多年的陳皮紅豆沙，不過係唔甜的，冇影相的金枕頭榴槤，原來Creamy同Coffee都好鍾意食．

Creamy同Coffee的晚餐．

某人話我唔"鍚"Creamy喎，今晚佢都唔知幾開心，又有成包零食吃，又有十二月麥生個份牛扒食，又有雞胸食，又有榴槤食，不過冇蝦食．．．