今晚玩手製漢堡包
因為星期日返外家食飯睇有線見到教整漢堡包,所以今天老婆又話要食,其實之前都整過日式漢堡扒,不過見佢的材料有啲唔同,於是又自己更改少少就變成今晚的晚餐啦.
紐西蘭牛扒粗切成肉粒,加啲紫洋蔥茸,少許紅尖椒粒(自己加的),用鹽,黑胡椒碎,孜然粉,Paprika(自己加的),蛋,麵包糠混合好片刻後煎成漢堡扒.加上芝士後用鋁紙包裹好用餘熱將芝士焗熔.
醬汁用壽司醋(原本係蘋果醋)加法式芥末,鹽,胡椒,白汁攪拌而成.
原recipe有生菜的,但有芥蘭就唔食生菜,於是只加蕃茄及酸青瓜(自己加的)就算數啦.
同場加演川貝燉鱷魚肉俾老婆食,希望佢啲咳快啲好啦.
師兄, 你真係得 ga la!!!
回覆刪除[版主回覆01/23/2008 08:52:00]好容易整,由零開始都唔洗一個小時.
個飽整得似模似樣~
回覆刪除[版主回覆01/23/2008 08:51:00]都OK啦,係個口唔夠大啫 ,如果搵到啲更好的麵包就好啦,唔洗成日食嘉頓 .
不如搵次大食會 ... 食 burger 喇 ~
回覆刪除haha ~
[版主回覆01/23/2008 13:32:00]自己整都好易,朝早整定個肉丸夜晚食應該仲入味.係我懶唔用food processer啫,唔係都冇乜難度 .
史太真係好, 病仲有人煲湯斜佢飲. gary只會話我冇鬼用, 病咁耐都唔好.
回覆刪除早幾日朋友話係坑口村到買新鮮漢堡煎極都有血水出, 佢問漢堡係唔係咁, 係要全熟定半生熟???
[版主回覆01/23/2008 13:55:00]我之前用咗一年多的時間先調理好佢個身子,冇乜傷風感冒都有兩年幾,係我呢年懶咗冇乜煲湯所以大家的身體都差咗,依家都要努力煲多啲啦.
出血水係可能件扒冇加粉入去,我用個recipe係有用麵包糠的,應該會吸咗啲肉汁.
街外買的漢堡扒一定要全熟,因為牛肉切碎後個表面面積增大咗,有啲位會包咗入個肉心入面,唔可以用"明火"煎到個面,如果在處理中途感染咗細菌又放耐咗的話會好危險.其實所有碎肉都係煮熟啲好,安全啲.真係要食生少少的話就要做多好多功夫,第一要件牛肉"新鮮",唔好解咗好耐出晒血水都唔整;第二係所有接觸到牛肉的器皿都要消毒(洗得乾乾淨淨);最後係即整即煮同即食.咁就可以將風險減到最低.
史生我都好需要調理下, 整多一個人份量唔係多, 唔該ar
回覆刪除[版主回覆01/24/2008 13:39:00]修理一頓我就識 .
老婆啲咳都仲未好,等佢食埋啲西藥又要去搵啲野煲啦.我煲湯都係亂咁來,睇下屋企有乜存貨就放落個煲入面,妳係咪想試下呀 ,後果唔包"嫁".
得閒返多啲富榮記,做多啲運動,食少啲零食就身體好啦.