年又過年

今年年三十係星期六，上星期又忙過不停，屋都未打掃過又過咗年啦．．．

．

結咗婚後每年過年都會發啲海味來吃，今年睇過月曆都係揀樣最容易的來玩，一斤得兩條的豬婆蔘，本身已經好大隻，乾時約八吋左右，發咗幾日就已經長咗一倍，屋企最長的一個盒(買來係發海蔘用的)都唔夠放，一個盒本應可放兩條的，最後放一條都突咗出水面，要久不久同佢轉下身。昨晚食咗另外一條的一半，好厚肉。

．

昨日一早去街市買咗三條共六斤十両蘿蔔返來，刨完絲後都有三點五公斤，好多水，切咗三孖臘腸、一孖膶腸、一條臘肉、數両大蝦乾及數両大元貝（其實係冇秤到），搞咗大半日，就整咗兩底蘿蔔糕，仲有少少剩，就用幾個杯仔蒸埋佢．．．

今次調個粉漿杰身少少，煎的時候會方便一點。

．

祝大家虎年行大運，最重要都係身體健康．．．