20090507的晚餐

都有一排冇post過食乜晚餐啦，近一個星期都係休養中，煮完都冇心機映相，加上食啲野食彩冇乜，屬於單色調個種，好似洋蔥炒羊柳，煎芝麻斑柳加他他汁等等都係鬼啡同白。另外今個星期都煲咗兩次湯，第一日就係豆豆雞腳湯，昨日就係冬瓜百合雪梨蜜棗南北杏豬腱湯，用來潤下個喉嚨，等埋啲川貝就可以繼續補補補返個喉嚨啦。

今晚一煲過，話說今日收工前忽然記起要去街市檔上海舖買材料，於是就急急腳走去啦，好左仲未關門。想買鹹肉及百葉，但見得返啲鹹腿骨係度，老闆就話買包裝的啦，但佢見我望下攪下，於是又再問你用來煮乜的，我話煮醃篤鮮，佢即刻係冰格攞返舊有肉的出來切比我，話我買咗包裝的返去煮明日一定返來鬧佢，因為包裝的得鹹味冇鮮味．．．老一代的街市買賣就係咁啦，今日買野唔啱口味明日就回來鬧，不過都係繼續買．．．

返到去將啲鮮豬腩用水煮好，由於冇時間唔雪硬，用冷水沖一沖就切薄片，煮豬肉的水就加埋之前煲來煮粥用剩的燒豬骨湯底再煲。鹹肉汆水後切粗條。另外之前出好水的春筍就用滾刀切。今次有樣失敗作就係唔記得拖過梘水的百葉唔洗煮咁耐，煮爛咗．．．因為湯底夠味，所有材料煮廿分鐘左右就得啦，最後加入白菜仔就完成。