20090221的晚餐

今日一早又起咗身，過咗海將兩張沙發運返大埔，由於客貨車裝唔落，叫咗架屋仔尾板車先裝得晒啲貨同人，唔洗四十分鐘就行勻香港九龍新界。

攪咗半個鐘就宴頓好晒，食完午飯街市又未開返，就睇下Creamy得唔得閒出來行吓街，剪完毛的Creamy唔似金毛啦，一見到我又係勁開心個隻，不過今次冇野食啦。

行咗陣街市開返，去到第一件事買咗豬肉先，再晏啲賣晒就冇得賣。買完肉去到魚檔見到剛分割克的大八爪魚，仲係度郁郁下，買咗一隻腳返來，賣個位姐仔仲問一隻夠啦，梗係夠啦，兩個人食多一隻個胃會頂唔順的．．．再過多兩檔見到啲雜魚仔，買咗六條返來，三條用日式煮法，另外的就明日再用其他方式煮。

二斤半肥瘦粗刴後弄咗廿一個小丸子及三隻大的，炸好後今晚食部分小丸子，其他的就留返過幾日食。呢幾粒都係炸得唔靚仔的，用豆瓣醬、檸檬汁、醋、喼汁、茄汁及糖調咗個酸辣汁，燴返啲肉丸就成為酸辣丸子。

八爪魚洗淨後用香葉、醋、鹽及胡椒粒煲滾的水煮廿五分鐘，另外原隻薯仔又煮廿五分鐘。煮熟後切粒切片再用橄欖油、檸檬汁、鹽、胡椒及蕃茜碎拌勻。

用日式高湯、味醂及豉油煮的雜魚。