20090219的晚餐

昨晚冇預備餸菜，今晚返來街市又冇餸賣，冇野食就買舊豬肉返來整咗三隻獅子頭，加少少八爪魚泡菜及西蘭花又一餐啦。

今次個獅子頭比第一次整的好，油溫控制得好好，只係有一隻因為弄得唔好烈開咗，少咗啲肉汁有咁好食，其他兩隻可以做到外脆內軟而多汁，個芡汁就比上次好，加咗啲貝仔落啲二湯一齊煲使個湯帶有鮮味，唔洗用蠔油攪到個色古古怪怪。其他冬菇同菜就唔落啦，清清地就算。

半肥瘦豬肉用咗半斤左右，粗刴之後就加一湯匙水及二茶匙魚露去攪至起筋後加一茶匙生粉攪勻之後弄成三個球。加熱油至一百四十度，放入豬肉，油溫會降低少許，控制溫度至一百三十左右就可以，炸約十二至十五分鐘，等外皮帶微焦色就可以，太燶的話會有苦味。另外準備上湯加入薑二片、蔥一條、八角一小粒、桂皮少許、老抽一湯匙、海鹽少許及貝仔十數粒一同煲滾試味，放入炸好的獅子頭一同用慢火煮十五至廿分鐘，我用小煲煮，汁液剛好蓋過獅子頭，所以不用返轉，完成後汁液隔去配料便可上碟。