20100613的晚餐

以前係大埔住見阿媽包下粽，見啲材料放好晒就手痕走去包幾隻。如今搬咗出來之後就返過去一次包粽咁大把。

唔講包粽啲野先，睇下今晚啲飯餸就知係來亂的。

去別街買咗啲坑腩，用自製的牛清湯底加香葉、黑白胡椒粒、桂皮、日本大根及冰糖去煮，時間關係當然係用壓力煲啦。

好難得見有別街新鮮牛柏葉賣，買咗塊返來，係唔係好似用舊咗個啲祝君早安呢。

切好後，用沸水汆幾下，見有少許收縮就要撈起，再加薑絲、蔥絲、辣椒及熟油，食時沾豉油。以前整得多海蜇，整呢味都冇難度，相比係鄉下食個啲仲係差少少。

為咗應潮流，唔買法國的，要買南非的Nelia，個牌寫有蘋果味，幾特別，又試下。

有時都唔知啲阿姐點做包裝的，將啲切開的檸檬放係蠔殼下面‥‥‥

啲蠔多泥，同佢地洗完白白先開，隻隻都好新鮮，食落真係有少許蘋果味。

蕃茄沙律。

甜點就係玫瑰露荔枝。今年第一次食荔枝，好貴但又唔係太好食。

。

今次係第一次自己由頭開始準備晒所有野去包粽。有燸米(差少少兩斤)、肥的豬腩肉(半斤)、綠豆邊(四両都有多)、蝦米、鹹蛋黃(六隻)、栗子、冬菇及瑤柱碎。

今次包咗十四隻，呢度只係一部份。C小姐仲話上來幫手，包咁少仲要妳來出手，我即係唔洗包啦。外形來包金字塔的，但係都係冇乜信心，包返我識個啲算啦。明早早餐就知道得唔得啦。

包粽的過程唔難，係之前啲準備功夫特別係調味就比較煩一點。