日偏食@HK TST

真正係香港睇日偏食都係第三次，對上兩次都係上個世紀的事。

自從香港唔再適合睇星之後都冇咗睇星呢舖癮，係間唔中月蝕就會走去望下，因為唔洗山長水遠走去荒山野嶺之外仲要成日食白果，好似啲流星雨之類就唔洗預我啦．．．

自從讀大學時期連續半年一好天就去觀測太陽黑子，好可惜當年係太陽黑子的平靜期，係間唔中有一兩粒黑子咁大把，之後都冇再做太陽觀測的記錄啦。原因好簡單，讀書時期要買合適的設備係當年係好昂貴的，到有能力買的時候香港的環境唔再適合，與其成日放係屋企的話不如放棄啦．．．

自從買咗數碼相機之後，一切都變得簡便咗好多，屋企最長焦距的鏡頭忽視多咗1.6倍，終於可以做映太陽的入門鏡啦。

早兩日忽然記起仲有張目視觀測用的濾光片，唔係好大張，剛剛好蓋得上枝長鏡上。由於濾光片不是供攝影用的，所以把出來的質素都唔會好得去邊。唔同人鬥大，以拍攝過程為目標。

今早早一點回去，不過上班時間的車程不能估計，到架好腳架之後開拍第一張都已經是八時五十三分左右。由於十點前有其他工作要做，約一分鐘左右拍攝一張，到食甚之後多拍少許就開工啦。

觀測太陽最重要的唔係護眼，而係防曬，搵位拍攝時最好梗係有得坐同遮蔭為首選啦。腳架是一般的腳架加上球形雲台，沒有追蹤太陽的裝置，所以太陽的南北極都唔知係邊．．．

映映下記起大小姐應該係附近，就叫埋佢來睇食甚的數分鐘啦。

食甚前後的色溫好怪，顏色帶了一點灰；雖然陽光普照，但係一啲熱的感覺都冇。