晚膳@妹記大排檔及糖仁街

今晚老婆外出用膳，自己忙咗一星期啦，一個人都唔想煮，於是搵埋大小姐及蜜蜂伉儷一齊出去食。

由於蜜蜂伉儷個Le Creuset印咗係Creamy個Pat Pat處，今晚食平啲，咁大小姐就去開飯度尋找字串大牌檔，結果係去九龍城或尖沙嘴，九龍城太遠及上星期又去過食泰國野，近近地尖嘴啦。

妹記本來係金巴利街市的，後來搬咗去金巴利廣場。忙完一天上返個網睇食評，結論係新不如舊，不過之前都冇食過，咪又去試下囉。

四個人叫四個菜試下先，其實係張枱細，叫多樣都放唔落。

叫咗個招牌菜「鬼馬油炸鬼」，返炸個油炸鬼好油，係我自己炸的四倍含油量，釀入去的墨魚滑鬆散冇彈性，百佳買返來的墨魚滑都冇咁差。

鋼鍋雞，勁多菜，隻雞應該好細隻，每人都可以搵到兩小件多骨的雞肉，但其中兩隻仲要係雞翼尖，仲有少少筍片及雲耳啦。

南乳豬手，各國的燒、炸、焗、燜豬手都食得好多，第一次食到咁差的。豬肉係冇味的，骨就炸得好脆口，但係皮就．．．腍的．．．連應該最重味的炸蒜粒都係得少少味．．．

飛天通菜，係唯一一碟可以煮得好過我少少的菜式，始終用家用的電磁爐幾大火力都比唔上炒爐啦，仲有佢肯落油。

食咁多炸物當然要啤啤佢啦。

食完四碟餸當然係唔夠啦，加餸不如去食甜品。行過兩個街口去到食街試下啲雪花冰，熱咗成個星期都係時候要散熱啦，叫咗份宇治今時。

個冰就幾好食，茶味夠、奶味唔會過重，甜度都唔會太濃，今日食都幾啱，伴碟的就．．．紅豆硬、仙草凍和椰果的味道跟個綠茶雪花冰根本就唔配合，只不過係將呢兩樣食材放埋係一碟咁。