開始有野睇啦

攪咗成個多月，終於可以睇到標清個四個台啦，不過仲要睇下夜晚的效果如何

轉咗數碼廣播之後，以為可以冇晒鬼影同雪花，點知得來係爆勁格

之前陪伴我十一年的CRT電視，兩個月前忽然開唔到，包括用最古老的方法：拍打冇辦法啦，真係MIJ的電視係襟用好多，雖然有少少問題，但係咁多年都冇維修過一次。

研究咗好耐，最後決定將部用咗幾年的LCD電視放入房。不過問題又出來啦，要放一部32吋的電視係一間幾十平方的細少房間真係頭都痛埋，放係櫃頂個視線又唔係咁理想，要放上牆的話就要買一個特別的支架先可以，最頭痛的係走線問題，裝修時冇預計放在那一個位置的．．．

終於找到一個幾特別的走線方案可以見唔到九成以上的訊號線及電源線而又唔需要穿牆破壁，但第二個問題又出來啦，點樣將個架成功裝上牆

鑽牆唔係大問題，一般要對準三個孔問題都不大，但係要四個孔要轉到好精確不偏差就係一個好大的問題啦，跟一般打膠塞的孔不同，爆炸螺絲的容錯率係好低的，偏差多一點都唔可以。最後都可以成功裝好個支架，不過就花咗成半小時先調整好。

滿以為可以安安樂樂睇電視，點知新來的iDTV睇唔晒三條數碼頻道，高清的兩條就冇問題，標清的就只有睇格仔。吓，乜數碼化後咁兒戲的，之前用問機頂盒都冇問題，反而用內置的電視就有

先找大廈的天線維修公司檢查下啦，去管理處叫佢地轉告，點知管理處話全屋苑918個單位得你一個出現呢個問題，不過都會叫維修的上門檢查一下。吓，乜又係我咁好彩

上來檢查完，用儀器檢查個訊號強度，好強喎，用一部八仔解碼器又收到晒喎．．．你搵電視的來檢查下部電視啦．．．

部電視係新的，都有呢個可能，於是找電視的來檢查下，上到來當然係接定部機頂盒等佢啦。機頂盒OK，電視唔得，最後都係換過部新的來。但係問題依舊．．．

都係裝修時百物一疏，冇諗過天線會有咁大問題，全屋電線都換晒，但就係天線出咗事。原身入屋的那一條天線唔搞佢就冇事，一掂就發現七勞八損，啲銅網大力啲都碎，玩得兩玩都冇線比我開來接駁，結果當然係換晒啲線佢啦。全屋所有線用咗106呎，而每呎就比HiFi線平好多（簡直係微不足道），6蚊一呎啦．．．材料的價錢跟搵一個師傅上來整差不多，但線材就一定冇咁靚啦。換咗之後模擬的就好咗好多，數碼的就仍舊．．．

再次找天線維修公司上門檢查，又係用一組儀器去招呼我，個問題根本就唔係咁簡單，用同一個技倆就想打發我，隔離啲老人家就可以，因為裝電視的已經講過隔離座都出現相同的情況。原來一般投訴的那一組人要有三個個案先可以轉介天線部跟進，不過以佢地呢個檢查程序跟本冇可能轉介得到．．．一般人見到個訊號夠晒強（係真的），同埋用一部解碼器接收到係唔會諗到係大廈天線的訊號係會有問題的，只會怪自己買咗件比較差的電視返來。不過我就唔係咁諗，既然電視個解碼器係電訊管理局認可的，冇壞的話自然應該可以接收，於是走去搵咗個最平的室內天線，向住發射站那一方用最古老方式去接收（慢慢移條天線搵個最好的位置），結果係比我搵到，咁就好玩啦，一個屋苑的公共天線比一枝二百元都唔洗的天線KO咗。

再次找管理處問下我仲可以做啲乜，佢建議我寫封信比管理處再轉介比天線維修公司。於是就寫咗封二千中文字的投訴信，內容係全面交代晒所有因由及我所做的所有驗證資料。攪攪下，今日終於約齊人上來檢查，數字上都係冇問題，問題就係係個訊號的質量唔好同埋搵到邊部份出問題（呢點先至係重點），有問題的頻諳內的波形跟其餘兩條頻道唔同（唔知文字點形容），要調較過條天線先得，不過應該仲有少少手尾跟，因為日間的接收狀況比晚上的好，要睇多兩日先知得唔得。

之前已經問過電訊管理局，如果今次再搞唔掂就會將個案轉交比佢地跟進。

********************************************************************

　　綜合我的不幸，老毛病又發作，行得太前會有好大的問題．．．

　　數碼廣播係一樣新東西，各方都要一段時間才可以磨合得好。如果大家都有接收問題，特別係舊一點的樓宇，有管理公司的及有公司承包維修的，就可以參考一下我的個案，至於單楝的舊樓又比周圍高樓包圍的問題通常唔係咁簡單，如果模擬本身接收已經問題多多，數碼接收將會是一件更痛苦的事。

　　最常出現接收問題的地方就係連接牆身至電視或機頂盒的線材，第一樣可以試的就係買一條更好的來試，不過如果大家唔熟識就好容易比街邊的電器店舖搵笨，因為佢地都唔識邊條先啱你。有少許電工常識的就去買一條有屏蔽(Shielding)的線材，再唔識就睇下條線入面有冇鋁紙就最容易認啦，一般十元以內都可以買到一米的，網上好多人都會叫人用上十幾蚊一呎的線材，講到天上有地下冇，用咗就會功力大增，啲色又會點圓潤咗。其實係公共天線系統之中，頭個一百幾十米係用上一般的工程線，質量本身已經好好，但點都唔會係啲發燒級線材，比例上已經主宰咗個訊號的特性，自己屋企內的十多呎線材點可以改變成個系統的效果，所以根本唔需要用上太貴的線材，除非由天線至牆身出口都係自己啦，咁就點玩都得。除非要拉好遠，正常兩米都夠用，加兩個頭都係十多元，四十元以內通常可以有很好的效果，自己做同買現成的價錢相差不多，但質量就一定比現成的好。至於點解我會買成六百蚊線材去更換係因為我平衡過搵師傅返來拉過啲線跟我自己買條好啲線材返來自己拉都要咁上下錢，只係將啲工錢轉晒落去啲材料上咁解啫。至於點解用上有屏蔽的線材會改善我都唔係好明白，最大可能係依家太多家電用上電子系統，做得唔好就有好多電訊噪音走咗出來，條線材冇屏蔽就會干擾啲訊號，解唔到碼就會起格。另外新裝修的喉管會用上膠燈喉，冇抗電訊干擾的能力，所以只好以線材的屏蔽去保護。

　　都係唔得的話就要睇下裝修時改過啲乜，由入屋的第一個出口接上解碼盒／電視，得就表示中間的接線出現問題，要搵人或自己搞過，要換的又係搵條有屏蔽的線材。至於再唔得就麻煩好多，一般人可以做到的就到此為止。這時就要搵天線維修公司來檢驗訊號的質量啦。如果係屋內的訊號有問題而屋外的分線器又冇問題，你可以要求天線維修公司拉一條訊號線入屋直接接駁解碼盒／電視，得就係那一段線材有問題，一般要自己更換，因為大廈公契列明的公共部份都係都個分線器為止；唔得就要維修公司自己攪掂佢。

　　好多時管理處／天線維修公司都唔會主動幫你解決問題，他們總有辦法令你覺得問題係出係你身上，但係呢啲低級技倆對我係冇用的，我最唔喜歡用言語去交涉，寫信會係一個好辦法，不過寫中文真係好難，寫一封出得街的中文信要花我大半天（當然係邊做野邊寫個種啦）去較對及打字。最後其實仲有一絕招的，不過非到最後真係唔好用，就係去信電訊管理局，佢地個回覆快到你唔信佢係一個政府部門。我早上寄一封三百多字英文電郵去，下午收工前就收到回覆，唔係1823個種，係直接比個答案個種，呢方面真係值得一讚，照睇今次我都唔需要勞動到佢地出手，但事件完滿解決之後都會報告一下，等其他人再有同樣問題出現時可以更快處理。