20090412的晚餐

韓風未了，昨日係韓國街買咗兩條韓式牛肋條，今日返來就用韓式醃醬醃咗幾個鐘。

用烤爐燒，因為油份多，冇直火咁快，不過就冇咁燶，如果醃耐一點會更入味；青椒加啲鹽就食得。另外就炒咗個飯，材料都係雪櫃有乜食剩就落乜：青豆、紅蘿蔔、洋蔥、粟米、紅辣椒、蒜泥、自製菜甫、蛋及冷飯。菜甫今次浸一浸水就冇咁鹹。

睇唔到啲日本青椒，跟碟八爪魚泡菜掉轉又映一張。

今日早上又去嘉道理玩，原因係老竇買咗五斤青梅，要快手攞返來整，唔係就會變黃。今年的青梅比較細粒，洗完就要抹乾。

行完半日山，返來仲要做手作仔真係攞命。

今次的比例係五份二係青梅，約三升酒。今之唔落冰糖啦，用返上一次整定的梅子糖漿，明日再落返啲檸檬就完成，大半年後有得飲。