20090405的晚餐

昨晚返到來都有煮飯，不過係食隔夜餸，冇映到。

今晚又係時候搵啲野攪下啦。再次整個西班牙海鮮飯，自由式。

材料有意大利Carnaroli米、鮮青豆、紅辣椒、蕃茄、雞腿肉、沙白、洋蔥碎、游水魷魚、乾蕃茄、西班牙黑毛豬肉腸、急凍半殼青口、鮮帶子、大蝦、鮮迷迭香及百里香、藏紅花及上湯。

大蝦開背去腸，鮮帶子只要肉柱及裙邊，魷魚切圈，雞肉去骨切小塊，青豆汆水，紅椒去籽切塊，蕃茄去皮去籽切粒，西班牙腸小滾刀切，蕃茄乾切細塊，沙白用水加酒煮至開口後拿出，然後加入上湯煮至合適的份量，加入藏紅花至上湯內。

先用油爆香雞肉盛起，再爆香西班牙腸盛起，炒香魷魚盛起，炒香帶子盛起，煎大蝦至七成熟盛起。用油炒香洋蔥碎後加入紅椒粒及迷迭香，再加入蕃茄，煮至乾身後加入米炒至熱透，加少許白酒，加入雞肉、青豆、百里香、魷魚及西班牙腸拌勻，再加入上湯，至收半水後排上蝦、蜆、青口及帶子。煮到差唔多收水的時候就放入焗爐烤乾。