20090410的晚餐

今日回大埔攞返啲土產及幫BingBing攞埋啲床舖，入開去當然要去街市行一圈啦。近日都食開蝦、蟹及貝類，忽然見到有條魟魚係地下啲盆度，行晒啲魚檔之後都要帶佢走啦。

有大細各一，細的好似冇乜肉食，大條又應該食唔晒，可以放低半係大埔食的，結果就帶咗大半條返土瓜灣啦，炒多少少西蘭花又一餐啦。

一魚兩吃，三份一用豉汁焗。

另外的就用辣醬焗。

兩種食法都加多塊蕉葉入去焗，等啲魚皮唔會黏住啲鋁紙。

魟魚都係要游水的好食，劏好的總會有少少阿摩尼亞味。