20090118的晚餐

今日去補鐘大半日，黃昏返屋企諗唔到食乜餸，見仲有啲芋頭剩，就整咗個排骨炆芋頭及一個三杯雞脾菇。

排骨洗淨去水後用生抽、老抽、酒、油及生粉醃半小時，由於啲芋頭係剩餘物資，是但咁切粒就可以啦，先將芋頭及排骨分別走油備用。另外準備好豆瓣醬、甜麵醬及麵豉醬混合好的醬料，先爆香蒜頭及蔥頭，再加入排骨，然後倒入醬料，再加入適量的水，煮沸後加入芋頭炆十分鐘。

雞脾菇小滾刀切好，用一份酒、一份醋及一份醬油混合好，再以糖調味，加少許辣椒汁備用，先爆香蒜頭及薑片，加入雞脾菇爆炒，再加入少許素上湯焗煮片刻，然後加入醬汁開蓋煮，待收汁後加入九層塔及蔥後收火加蓋焗片刻，最後加入麻油便可。

今後本來想整個楓糖吐司明早食的，但由於太耐冇整，唔係好肯定整唔整得返，都係整個最基本的就算啦。

另外再整多個大的檸檬酸乳蛋糕。