整糕日

是日終於有時間整糕啦，亦終於將個打邊爐用的電磁爐攞埋出來用先夠爐頭用，而設計廚房位置時亦已經預留位置及插頭以供使用，總算容得下啦。

一早起身切埋啲冬菇粒，撕好啲瑤柱絲，刨切蘿蔔都用咗成個幾鐘。

六斤蘿蔔蒸咗三細底蘿蔔糕，細細份都幾好分。

另外試整椰汁生磨馬蹄糕，味道唔知點。兩款糕都係跟珠璣小館的食譜做，只係蘿蔔糕冇用鯪魚湯，過年買鯪魚來整，真係錢多冇地方使咩，用咗少許大地魚末代替，可能水會少咗啲，不過要食過先知。呢個馬蹄糕的工序都好多，本來要一公斤馬蹄的，因為貴，最後買咗二磅就算啦，用刀小心啲，將個廢棄率降低啲來補夠，拍碎晒啲馬蹄後仲要加椰漿煮，最辛苦都係要攪個粉漿，攪到要杰晒，不過我都唔係好明個效果要點先停止。

明日有時間可能會整年糕的。今日下午去咗買件新玩具返來用，唔知好唔好用呢