20090117的晚餐

今日試整新菜色：韓式人參雞。

話說想整呢味餸好耐，自從前年係南韓食完呢味菜色之後一直想返來複製，當年有黑雞同白雞揀，不過依家好難搵烏雞啦，攞住隻普通雞試下先。

隻雞洗淨去頭頸及腳，雞身釀入一條鮮吉林參、四粒大貢棗、一茶匙鹽、一杯浸好的糯米，用竹籤封好開口之後，再加半杯真露酒及水燉兩個小時。雞頸去皮去肥後當然跟雞腳一齊放埋落去煲啦。

加多碟魚露炒西洋菜又一餐啦。

湯水好清，去油後將雞隻盛起，拆開好便可食用。糯米吸了雞味、紅棗及人參的香味，非常好食，而雞肉則吸取了人參的香味，食味唔似煲完湯的雞肉，加少許韓式辣椒醬就可以啦，反而用豉油作沾醬的話，豉油味會太搶。今次用上貢棗，體積比一般紅棗大上兩倍以上，跟平常食的紅棗不同，味道非常甜，香味更濃郁。

上次係南韓食的湯底係奶白色的，但今次由於用文火去煲燉，湯水非常清，自己煲自己的味道當然會淡一點，但作為家常餸菜我又覺得唔洗攪到咁複雜。另外條鮮人參只係出咗表面的一層味道，下次再整的話要諗諗點將多啲味道混入湯水及雞肉之中。兩人食一份雞腔大小的糯米飯係唔多夠的，下次要試下將另一份餡料用魚湯袋裝好放入煲內一齊煮。