20090113的晚餐

今日非常凍，凍到個頭都有啲赤赤痛，連續兩日都係街市收檔前先去到，只有買同唔買的選擇，不過唔買就冇得食。結果買咗條紅衫魚起肉煎香加他他汁，同埋炒少少菜芯。

今早唔記得浸冬菇，冇得整碗仔翅食，最後整返個雞絲翅。啲雞絲係真的，用雞柳做，不過都係今晚買，唔夠時間雪，所以又切唔到幼絲。個湯底整個陣唔係預算整翅的，蓋住來煲所以比較白，加少少火腿濃縮多少少，推返個芡就上枱。有碗熱湯飲真係暖好多。

今晚用咗好多時間去準備今個星期的餸菜，希望來緊個幾晚可以輕鬆啲啦。