一段沉悶的時間開始啦

昨晚睇完開幕禮，整體上都唔錯，表演的前半部比較好睇，後半就相對差咗少少。

真係辛苦咗李寧啦，一把年紀都仲咁博命，不過唔係佢都唔知邊個可以做得到，唔通叫許海峰咩。都仲係覺得個火盤鬼祟咗啲，似一枝煙仔放咗係個煙灰缸上面，完全合乎國情。

今日由早到晚都係強迫收視，個個台都係播奧運，幸好仲有有線睇，唔係就真係唔知點算啦。

最差個台都係非ａ台莫屬啦，開幕進場個陣都已經比佢嚇咗一跳，字幕打出以色列個首都係耶路撒冷。今日仲攪野，某位成日錯漏百出的女主持一聽到另一位中國體操運動員的手臂比電視上的那一位仲要粗就即刻興奮到嚷著要看，佢真當睇肉咁睇。最頂唔順的都係那台的聲效，可能是有現場觀眾的關係要用揚聲器，攪到好似係太空做節目咁。

其實三色台都唔係好得去邊，可能係新埋班的關係，有好多野都未係咁好，不過就冇另一個台咁多低級錯誤出現。

有時都唔知愛國係唔係一件好事，兩個中文台都成日播影有中國運動員，特別係有金牌機會的，就一路咁播住，奧運唔係得佢地幾個人的，好似體操咁，雖然係預賽，但係適當時候播返啲係一個項目入面最高分個位出來，唔好理佢係邊個國家，分析下點解可以拿到高分，唔係搵啲專業評述返來真係做佈景版咩，等大家知道大家的水平去到邊度，唔好到最後攪唔到牌之後先做事後孔明。話晒男子體操中國唔係有絕對優勢的，好似上屈咁就．．．

好在英文台的口味有啲唔同，可以睇下其他比賽項目。不過過多一兩日就應該電視都唔想開啦。