20080817 Brunch @ Intercontinental

今日Matthew一家宴請我家一齊去洲際食Brunch Buffet。十一時半到達，食到三點左右，好耐都冇食過一餐咁長時間啦，當然呢個係家族聯誼時段，時間多多都唔夠，對上一次一齊見面都要數到數年前結婚的時候了。

今餐的食物水準好高，先來一滿杯Moët & Chandon，飲咗一半先記得影相，前後飲了六整杯，應該有一枝啦。對上一次咁早飲香檳送餐都要數返十多年前係澳門峰景的早餐啦，當時唔係咁飲得酒，飲完成朝都好high，今次就好啲，走個陣啲酒氣都散咗九成。

人齊就開始食頭盤，有西班牙及義大利火腿、好味的麵包條及數款芝士。墨汁味的麵包條有好濃郁的墨汁香味，而正常的就好鬆脆。

食完頭盤當然食第一主菜啦，半隻波龍及半打生蠔，仲有好味的凍蝦。

再戰西班牙火腿及芝士，左上方的是從一整舊巴馬臣芝士鑿出來的芝士塊，鑿的時候個份滿足感真係難以形容，一口芝士加一口香檳真係好好味。中間仲有食其他野，當然係係人地個碟拿過來，不過就冇影低啦。

忽然好想食咖哩，用二小片Naan點來吃。第二主菜係一片燒得好靘的牛扒配燒汁及法式芥末。

最後吃了一片煎鵝肝過下口癮，不過應該唔係法國貨。

甜品時間。平常吃自助餐除了頭盤就跟住吃甜品，因為一般的自助餐主菜都唔係咁好食，但係今次主打的非常好食（當然有好多正常自助餐都會吃到的壽司、中式食品等等），食到甜品舌頭因為之前太忙忙到食唔到好細緻的味道，只知水準正常應有的好，但冇驚喜個種感覺。

竹笙魚翅湯，湯底好靚，應該有用洋腿骨去煲的。

餐後飲咗杯Double Espresso，都係屋企沖得好飲啲（我估係啲咖啡豆問題多過沖調方面。）

飲飽食醉，晚餐都唔想食。

最後多謝Matthew一家的款待