20080816 Dinner @TKO （Updated）

今日C小姐又話有日本野食，咁又越過高山越過谷入咗去TKO啦。

是晚的主題係北海道魚生，由於唔想交叉冷熱進食，影響口感及浪費食材，於是分開兩輪出場。

Round 1：

不惜工本的北海道魚生飯。（未加紫菜絲）

今日用明火煮咗六杯米，之前煮過幾次的都唔係咁好，通常啲飯我軟硬情度都唔係咁平均，但係今次就好成功。原來以前啲人要煮好一鍋飯唔係咁容易的。

第一層飯。呢度係五杯米的份量。

加上青瓜粒。

玉子粒，用三隻日本蛋加木魚湯調製，煎成條狀再切粒。今日終於有閒情煎玉子啦。

2L帶子粒，一粒開十二份。

牡丹蝦。十尾蝦肉每尾開四份。

醬油漬三文魚籽。

海膽二盒。

顏色唔夠豐富，最尾加咗少少紫菜絲。

大戰過後。今次唔係Bingo上過枱，而係比人KO晒。

一盒2L帶子用咗幾粒切大粒，其他就薄片當魚生食，沾少許鹽比用魚生豉油好吃。

C小姐弄的高湯煮日本蘿蔔。

酒糟毛豆，Bingo至愛。

拍黃瓜，加辣版。青瓜去瓢後略拍，加鹽抽出水份，沖去鹽份後瀝乾。食前一小時加入用醋、糖及辣醬調成的醬料。

凍豆腐。加薑茸、蔥花及麵汁吃。

Round 2：

香草牛油煎游水大花竹。今日一早去咗大埔街市買蝦，但係蝦的數目開始少咗好多，冇以前阿聯酋首都咁樣。但都有好多游水的選擇，見啲花竹都幾大隻，又唔貴，買咗兩斤幾。返屋企剪晒啲鬚及腳，包好就向TKO出發。蝦開背去腸，牛油室溫弄軟後加入蕃茜碎、檸檬皮茸、鹽及胡椒碎，之後釀入蝦背中。

由於C小姐的廚房變咗阿聯酋首都，同時開兩鑊一齊煎都煎唔晒，有六隻要後上。

燒熱鑊，放上蝦，煎至半熟灒酒焗至全熟。

由於係雪櫃攞出來即刻煎，驚個心熟唔透，都係煎耐少少好，過咗少少火，不過有殼同牛油保護住，啲蝦肉冇老到。

蒜泥魚露炒蘆筍(冇影到)。智利大蘆筍去硬皮切段後汆水，用蒜泥炒香加魚露調味。

仲有炸牡丹蝦頭都係冇影到。蝦頭去水後加入鹽、胡椒碎及小許生粉拌勻，半煎炸至熟透。

Round 3：

蟹麵，冇食到。

日本夕張蜜瓜，由於時間關係冇食到。

．．．

今日Bingo有好多野食，成日食到冇停口。青瓜、帶子、三文魚籽、海膽、日本米飯、毛豆、蟹麵……

最後係小狗開餐時候，今次唔食手卷，要食魚生飯：

有蝦肉數塊、三文魚籽、青瓜粒、熟蘆筍粒及日本米。由於傻佬Bing已經食晒啲帶子邊，所以冇得再食啦。

今次終於有Kelly份，佢話咁好味當然要留返粒飯今晚宵夜啦。

相關網誌：

0816北海道大餐@TKO

0816北海道大餐@TKO - 小狗篇

08162008海鮮餐 ~ 北海道直送

08162008海鮮餐 (二)

北海道海鮮宴之二 ~ 美食篇

北海道海鮮宴之二 ~ 小狗篇

北海道海鮮宴之二 ~ 陶醉篇

材料：

東瀛宅急便（同我冇關的）

大埔街市