在大埔生活的第一天

一連三日馬拉蟲式搬遷,終於張間屋清理晒,總共用咗3.5架van仔將啲日常用品搬回大埔,1架van仔將啲玻璃及缸瓦放係沙田,一架5.5噸滿的貨車將傢俱入115呎倉.

原本0.5架van仔的物資會用螞蟻搬家方式運回大埔,但係真係大攰啦,比多50蚊唔洗煩.睇落好似好多野搬咗返大埔,但係unpack咗啲之後又唔係真係咁多.應該係執野個陣冇pack好,上van仔又唔會將佢疊高,用心pack的話應該2轉車都ok.

昨日入倉都幾順利,由於種種關係之前報細咗個倉尺數比我,我自己估應該都唔夠的,結果要由原來的觀塘倉轉咗去葵興倉.

佢地一行5人攞齊架生上來諗住搬屋,點知一入來見到成屋野已經pack好晒,紙皮箱仲要包晒保鮮紙同打好晒膠帶,所有傢俱電器全部用晒紙皮及保鮮紙做晒protection(本來唔想攪咁多野,因為見個天唔穩定,上車地方又冇瓦遮頭,一濕咗又放入倉幾個月都唔洗攞返出來啦).最後都係一個人係屋入面幾啲物件夜上板車,係走廊排晒隊等落街上車.

好戲在後頭,成屋傢俱係得張床冇搞過,唔係我唔想搞,係我真係唔識搞,之前上來個陣都要將床板係樓下大堂拆咗先上得來,裝個陣我又睇唔清楚佢點整,結果都係留返比佢地做,玩咗成大半個鐘都係唔得,原本諗住放棄,叫佢地幫我整散佢先可以攞去垃圾站,最後係暴力之下就開咗啦,而開口位都係啲螺絲位,一天光晒,上埋車入倉啦,最多幾個月後比半日玩下砌積木啫.

總結返今次搬家大行動,洗的錢比我係度住多幾個月少,返咗大埔之後做少咗家務可以花更多時間去搞間新屋,應該可以plan得更好(希望可以洗少啲錢啦).入倉的東西好似好多,其實係啲野大件,23個紙箱加5個紅白藍的細軟其實真係好少,最多的其實是全屋家電及傢俱都要入倉,而好多朋友的經驗都係唔搬傢俱,因為大部份都係tailor made的.而我買的所有傢俱全部在購買前都係plan好要搬得走的,所以先會有咁多野要入倉.

今早六點幾起咗身,周身肌肉都仲係酸痛,過多幾天應該冇問題,依家最驚都係個腰位有少少隱痛,希望都係肌肉過勞個種就好啦.