20080726的晚餐

今晚又去搵creamy coffee玩，四人二狗整咗三個餸。

酥皮系列之ｘ：酥皮焗紅酒牛肋條。加拿大牛肋條、蒜頭、洋蔥片及紅蘿蔔片（蔬菜）用紅酒醃一晚，然後將蔬菜及牛肉分別瀝乾備用。蘑菇切大粒。先將牛肉加小許鹽及胡椒用大火煎封好，然後再炒蔬菜至乾身，灒酒，再加入茄膏炒香，加入罐裝蓄茄及蘑菇，將牛肉回鍋，最後加入相等比例的上湯及醃料，用鹽、胡椒、糖、芥末調味。中慢加蓋煮四十分鐘。另外新鮮蕃茄去皮去籽切粒備用。預熱焗爐至二百一十度。酥皮壓至比容器大少許，預備蛋黃一隻。牛肉再用中高火將汁液濃縮至適量杰度（約十至十五分鐘），加入新鮮蕃茄及少許黑醋，將材料放入焗盤容器內，蓋上酵皮，塗上蛋黃。焗十五分鐘左右。由於各焗爐的火力不同，要不時觀察表面的金黃程度。

今次個酥皮好靚，邊位好脆口。

冬菇蝦米粉絲炒椰菜，改良自滔滔的食譜，其實係放工前唔記得望多眼個食譜。椰菜及冬菇切絲，冬菇用少許糖、豉油及麻油略醃，粉絲浸好剪碎，蝦米浸好去殼。先爆香蝦米備用（唔記得咗），再炒軟椰菜絲，加入冬菇及蝦米，用糖及豉油調味，最後加入粉絲。

薑蔥炒辣蟹。自從上次買咗啲唔知乜蟹之後都冇再煮蟹啦，今之去街市都係估估下。蟹洗淨切件上粉煎封好，再爆香薑片，蟹回鑊，灒酒焗片刻，再加入蔥白、蠔油、豉油、糖及菜ｘ辣醬煮。最後加入蔥綠及黑醋便完成。

最後大西瓜四份一個。

後記：

兩隻小狗今晚有蟹腳及西瓜食，晚餐就加送蛋白一隻。

都仲未好慣用電磁爐炒蟹，努力研究中。