20100405的晚餐

今晚只煮一味，不過工序都幾多。

昨日係九龍城買咗兩片西班牙依比利亞有骨豬扒返來。

跟Le Cordon Bleu的其中一個食譜去煮。

先將220克洋蔥切薄片用30克牛油炒軟盛起放涼備用。

約550克薯仔切薄片，不過家中最薄的刨都係切到咁厚．．．將薯片跟炒好的洋蔥絲混合，加鹽及胡椒，然後用手搓揉，之後用手擰乾水份。

另外用少許油煎封豬扒各面。

再舖上去水的薯片及洋蔥絲，另外加熱250ml的雞湯，湯內加少許新鮮的Thyme，將湯液淋在薯片上，再分數次放上(25克)的牛油，用160度焗一個半小時，最後加大火烤面。

由於製作時間頗長，slow cooking就係咁啦，煮咗一條腸仔頂下肚先。

Côtes de Porc Champvallon。

薯片的用途就好似加蓋去煮一樣，但係又可以散水氣，味道就留返係個餸菜入面。

咁樣煮個餸三樣食材的味道都好調和，洋蔥有雞湯及豬肉的香味，而豬肉就有蔬菜的味道，薯片脆口的質感跟軟稔的洋蔥及豬扒形成一個對比。