20100428的晚餐

今晚收工去掃街市，行過魚檔見有呢隻龍蝦賣64一斤，魚販叫佢做火龍，實質上佢叫脊龍蝦，生長係三十米以下的水域，常見於海南島一帶，記得書本上講過呢隻啲肉質係市面上買到最差的一種，未食過又見佢係游水的就買兩隻返來，都只係八十大元就有龍蝦吃，比食蟹更方便化算。

買個陣都仲未諗到點整，最後決定用開邊加白汁焗。個殼都幾硬，用刷洗乾淨後開邊去腸及沙囊。另外用洋蔥加牛奶、鹽、胡椒、芥末及香葉煮個白汁。煮好白汁後淋上蝦肉上再灑少許粗麵包糠。之後放入焗爐先以170度焗十分鐘，再轉大火烤面。

呢種龍蝦啲肉質冇咁結實，唔用呢種方法真係唔知點整好，如果炒球肯定散晒唔見食，所以賣唔起價。個白汁吸咗個龍蝦鮮味好好食，我諗加少許煙肉碎會更好。