己丑冬至

是日冬至，煮一餐飯足足忙咗兩日。

煮中菜一向都唔係我的強項，睇就好少野，不過之前的準備功夫真係唔少。

一枱餸．．．

加多一條筍殼魚，應該少一分鐘都得。過冬乜魚都貴，只有筍殼魚一樣係咁貴，所以就買佢啦．．．

再一次要三個爐頭一齊開。為的就是要十分鐘之內全部上枱，因為早日天氣凍，啲餸好快凍，不過今日又暖返啲．．．

早一日已經用斤二肉排、兩隻烏雞及一舊二吋厚的章腿去煲隻南非鮑魚。五斤半料先攞到二斤幾汁液。再於是日用部份來炆冬菇。雞肉及火腿就部份拆用備用。

另外又於前一天買定鯪魚用匙刮肉來整個老少平安，不過都係仲有少許紅色滲入啲白魚肉內．．．瑤柱碎又係早一日煲湯時一起先用薑酒蒸好拆絲．．．大腰果先烚熟，再用凍油慢火炸好備用．．．

是日下午就將魚肉調好味加豆腐弄好。筍殼魚就洗淨抹乾，切好蔥絲及陳皮超幼絲。冰鮮海蔘先用薑蔥汆水，再切幼片。餘下就係三色椒、菜脯、瘦肉及帶子切細丁。

買咗斤半豆苗，去莖後只有斤二両，不過就冇用晒。煮前用沙律用的去水器弄走大部份的水，炒時就唔會成鑊水。

好在有個大焗爐，Set咗80度加一盆暖水係入面就可以保溫濕啦。

鮑魚炆冬菇，呢隻鮑魚據講係先用製乾鮑的方法弄至半乾再急凍。食出來有點似乾鮑的感覺。

豆苗要分兩次先炒得完，先將一半炒至七成熟，炒另一半至七成，再將第一次的回鑊，調味，上碟。用鮑汁煮好瑤柱絲舖上面。

老少平安。

用鮑汁開的湯羹。加火腿絲、海蔘絲及雞絲。

炒粒粒，青色唔夠。將帶子汆水，三色椒及肉丁分別炒好。煮完豆苗後，再將肉丁、菜脯、三色椒及帶子逐一加熱，然後用豆瓣醬、糖、黑醋及豉油調味，再將腰果放入拌勻。

又比人整古，以為燒肉及雞切好先攞上來，點知要我切埋，薑油又要整過，收晒鉆板又要攞返晒出來，結果就用咗廿五分鐘先完成．．．

大孖。

細孖。

今日唔記得買兩舊叉燒又或者係兩舊蕃薯返來．．．

不過佢地又好乖，冇喊過，應該係我張床好訓過佢地個張啦