2009聖誕第二餐

前一天．．．

好耐冇燒過羊髀，今次唔食蒙古的，買咗隻紐西蘭來吃。

起咗一條骨出來及切去多餘的肥肉。

加少許蒜片、Rosemary及岩鹽。

用棉繩扎好。

加少許Rosemary及岩鹽係面又放返入雪櫃。

另外上次及前一次買返來的西冷頭及尾去晒啲肥肉及筋。

今天．．．

羊髀先用猛火煎封各面。

放係個網上面用160度先焗一面四十分鐘，再反轉另一面焗四十分鐘。

之後再反轉多次再多焗廿分鐘，用溫度計插入中央，約六十五度多少少就可以出爐，之後用鋁箔蓋著約廿分鐘，溫度會再升高的，約七十二度左右，要全熟就要多焗十分鐘左右，由於大小不同，睇溫度最準（七十五就全熟）。

切個陣感覺到啲肉好有彈性，外層剛熟，內層約七成左右。

另外就用西冷頭尾煮咗個牛肉醬，放係有青豆的炒飯面加少許芝士焗。

諗唔到食乜菜好，就用絲瓜炒雲耳。雲耳先浸透，剪去硬塊及洗淨砂泥，用白鑊弄乾後贊酒備用，絲瓜刨清啲皮，用薑片起鑊，炒至微軟後加入蒜泥，之後就逐少加入雞湯去炒，最後加入雲耳，用鹽及蠔油調味。

另外又買咗凍豆腐返來吃，當然係配日本的靚柚子醋啦，羊髀就配自製的薄荷醋汁。

煮幾味簡單的容易控制好多，係個焗飯冇時間去睇就乾咗少少，不過個飯本身比較濕潤就冇乜問題。

呢枝酒好特別，聞說係大陸某市領導送比我老婆的老闆，話說好貴，樣子依大陸標準係好高級的，不過招紙有中文字，酒應該西班牙入口然後係大陸入樽的，至於味道就．．．酒身薄，冇果味（其他味根本就沒有），開時酒精味重，回味沒有．．．超市八十元以下的貨色啦