行山拍照就算用超廣角鏡好多時都唔能夠將一個廣闊的景觀用一張相來表達，視角太闊的話相片的細緻度又會減低。呢個時候拍全景照會係一個選擇，不過行山要再多帶幾公斤的器材去偏遠的山區又會係一個沉重的負擔。除非有充足的資料搜集、準備及天氣非常合適，否則一般行山，特別要穿林及大上大落的路線係唔會帶拍全景的輔助器材。
今次行程在地圖及衛星圖已經預視過都有幾多地方會有拍全景照的需要，當然拍攝時會受到實際地理環境、光源及大氣的因素影響，總之一切隨緣啦。
手持相機拍全景照最大的問題係要保持相機的轉動方向要平順，時高時低的話接出來的相片會好矮小，相與相之間的接疊位置要有充足的高反差物件，否則一般接駁軟件係接駁唔到的，另外如果要包括十五尺以內的景物，相機轉動的軸心一定要好接近鏡頭光圈葉片的位置，否則太大的視差會使接駁出來的相片會有鬼影。講就容易，但係現場要運用返出來就唔係一件容易的事。
今次主要都係用上28mm焦距直度拍攝，拍攝張數約五至七張左右。拍攝時首先要搵一個安全的位置，180度以內的就唔需要太大，企得定個人就得，如果超過180度的話，左右兩邊一定要留多一點空間方便轉身，因為好多時開揚的景觀就係係懸崖上面．．．
先用相機對著想要的景物測光，我通常會用上f/8的光圈值，有時光差比較大的時候就會用上中間值去拍攝，另外在日光日白的時間，用返sunny 16 rule去判斷曝光值合唔合理，好似ISO為100，光圈值為f/8，快門值會在1/400秒左右，但要考慮埋暗位的曝光，所以一般會係1/200至1/250秒之間，當然最好係先拍一張出來再微調曝光值。然後轉為手動曝光模式，將曝光值輸入。
再將自動對焦功能轉為手動對焦，因為改變焦距的同時視角也會有少許改變。對焦位置距離問題唔大，除非係全相出，否則縮圖後好難會走焦的，一般會將對焦點放在三至五米左右的位置上。
另外因為好大機會會向著陽光拍攝，所以差少少的filter最好唔用，同埋清一清鏡面上的塵粒。
萬事俱備，只欠按掣。不過最好先預轉一圈部相機睇下順唔順暢先，唔係拍到最後一張先出事又要從頭再來過。用左手一隻手指按著鏡頭近光圈葉片附近的位置作軸心，從左至右又或是從右至左都可以，拍一張後慢慢轉部相機，直至約有三至四份一重疊就可以拍下一張。頭尾兩端最好包含多一點多餘的景物，以便在接駁時有足夠的剪裁空間。
今次的天色都唔係太好，順光出來啲相會好一點，但係一場來到，冇理由唔拍咗先。
．
係麥徑第一段過咗東壩之後上斜後右方有個觀景台，可以望到浪茄灣的景色。相中間與浪茄灣相連的岬角位就係拍第三張的位置。
浪茄沙灘。山徑的位置比較入，唔夠邊，所以拍出來有唔夠闊的感覺。
往浪茄仔前的一個岬角可以拍到接近270度的景觀。向住陽光拍，顏色會差一點。由於縮圖的關係，感覺比原相差少少。
浪茄仔灣接近180度。位置太險，前一呎已經係懸崖。
離開浪茄仔向罾棚角咀出發，回望浪茄二灣。
過咗長岩頂，因為有空地，試拍一張360度。
係罾棚角咀再來一張360度。地方平坦又有另一個問題，就係前景會太多，仲有要搵一舊石頭或高少少的地方去拍會好一點。
手持拍360度真係好難保持轉一圈都係在同一軌道上，總會有高高低低及相機唔係垂直，返來用軟件接駁時要用人手再微調接駁位。
沒有留言:
張貼留言