20091205@罾棚角頂

本來打算輕鬆一點的路線變成本地大長征，原因係有地質步行活動進行（事前係唔知的），十時開始就由西壩往東壩的道路開始封閉，如果早多十五分鐘就可以行少好多不必要的路段，結果多花一小時的時間及體力，換來就係行咗咁多年山第一次雙腳抽筋抽到行唔到．．．

話說我的時辰八字係跟麥徑第二段係唔夾的，有幾次行都有小意外發生，包括接近中暑、尾段缺水等等。今次就來次更勁的．．．

由於要多行咗路程，食物的準備有點不足，加上時間上要控制得緊一點，以免入黑後仲未行到吹風坳，有幸的是大氣唔清，想多拍照片都唔可以。休息的時間相對減少咗好多，拍照所花的體力比得上上行的所需要的體能。

由浪茄開始就離開麥徑第二段，沿小路過浪茄仔，再上長岩頂過罾棚角頂出罾棚角，山路唔係難行，只係有啲位比較險峻，小心一點就冇事。另外又要經常要穿過矮樹叢，感覺似破冰船多一點，矮樹叢唔知點解係近山頂的位置就開始出現。

出咀通常要走回頭路，不過回程時的景觀又跟出去時有所不同，當然大氣再清多一點的話就更好啦，可以遠眺四灣的景色。過咗長岩頂之後見有路可以過對面山脊再上睇魚岩頂，咁就唔需要行回頭路，於是就急降五十米，再急攀一百米啦．．．

其實睇魚岩頂先至係今天旅程的主要景點，呢個係人稱西貢三尖的一個山頂，但高度只有233米，但地勢就非常險，山頂比較長，約四十多米左右，有點似縮水版的大刀刃。玩完就要下降至一百八十米高平走一會再急升至二百六十米才接回麥徑第二段，然後再升至全日最高點的西灣山。由於這段路在山的東邊，太陽又開始下山，所以大部份時間都係在陰位行走，加上風吹的關係，感覺有點凍。接回麥徑後就見返個太陽，感覺溫暖好多。

由西灣山開始雙腳開始發軟，但往後的路段係下山路段，仲要係啲不必要的梯級，上身重對雙腳的肌肉構成沉重的負擔，加上出門時又忘記帶護膝，走了五百米左右雙腳開始有抽筋的跡象，但係係山徑中間，都唔輪到你話唔行就唔行，再過多一會太陽下山就會好麻煩啦，只好像以往一樣，希望行多一會就唔會再抽啦。不過往後的一公里半絕大部份都係下山梯級路段，再加少許上山的，雙腳在吹風坳前的七百米就開始嚴重抽筋，停下來時無論任何姿勢都比行時更痛，最後當然係死頂埋佢啦．．．

去到吹風坳的小亭時終於可以坐下來，但雙腳在任何一個正常的姿勢都係劇痛無比，好在無意中發現一個得別的姿勢係完全唔痛的，這時就想起急救包內應該有一枝deep heating的，不過希望越大失望又越大，係唔知幾時用完枝藥膏冇放回原處，但係有一枝無比膏係度，佢的成份都有少許冬青油的，應該唔多唔少都有幫助。就係咁係出西灣亭的一段路用自我慛眠的方式行多咗一公里半，中途只記得個鹹蛋黃緩緩的下咗山。係西灣亭休息時發覺雙腳已經冇再抽筋，都唔知邊樣有效又或是呢個雞尾酒治療法有效

由早上九時五十分起開如由西壩出發，到下午五時半才到西灣亭，全程十六公里，七個多小時的行程都算值得一行的。

返屋企前早落兩個站巴士買咗個比薩回家當今晚的晚餐。

相片太多，未有時間處理，遲些再Upload