2009Macau之旅-第一餐

上岸不久，便直去Hotel Casino Lisboa（個外文名係唔係好比葡京好聽好多呢），不過唔係去賭錢，而係去一間正牌的三星法國餐廳－Robuchon a Galera。

第一次去星級餐廳，我對星級餐廳的認知不多，只知貴及要等，賣相及服務的要求會好高。Joël Robuchon成名於上世紀八十年代，主理的餐廳Jamin開張三個月就得到第一顆星，之後好快就得到三星。九十年代結束了之後再用自己名字開業後好快又攞到三星。除此之外，與Michelin齊名的法國飲食權威Gault-Millau將Robuchon選為世紀名廚。講名氣就真係夠晒啦。

雖然掛住Joël Robuchon的名字，但係主理的當然唔係佢本人，因為佢已經退休，主理的係佢個弟子Francky Sembat ，不過佢每年都會來四次的。

餐廳的裝飾屬於半宮廷式的傳統豪華裝修，每張枱都會有一個琉璃的擺件，不過我就唔係好喜歡呢隻蜻蜓啦。

餐廳用上Christofle的餐具及Bernardaud的杯碟，不過就有點舊的感覺。

我點了五道菜的午餐，而老婆就點了四道的。

點了菜之後不久就送上一籃麵包。

其實都唔知佢應該叫乜名，記得幾多就幾多啦。

煙肉餡的法包。

濃芝士餡的法包。

小法包。

唔識叫的法包．．．

都係法包

唔知我幾時先可以整到呢個水平的麵包呢

Welcome Appetizer，底層係西芹粒，中層係啫喱，頂層係蘋果汁慕絲。慕絲好幼滑，整理的味道好開胃。

食食下終於等到本Wine List來啦，呢度出名在個酒庫藏量，一間餐廳可以有五千種以上的餐酒，本Wine List仲厚過電話薄，應該係應用手冊先啱，有成四吋厚，點都要見識下。

食西餐一般都會開返一枝酒，食法國菜唔開返枝酒就會欠咗啲野咁，其實昨晚已經冇飲啦，今日點都要開枝飲返夠。最後都係揀返枝佢地挑選咗出來的葡萄牙白酒，因為我好少會揀枝貴過餐飯的餐酒的。

．

跟住就係頭盤，Le foie gras mi-fumé en copeaux sur un lit de champignons confits à l'huile vierge，即係輕微煙燻過的鵝肝醬刨片及醃製過的蘑菇，側邊有無花果及少許金箔。

鵝肝非常軟滑，入口即熔，黑胡椒粒及岩鹽花將鵝肝帶到另一個層次的味道。蘑菇的味道相對清淡，唔會跟鵝肝鬥搶味道，主客分得好清楚。食兩片後跟一口白酒，味覺即刻返晒來，可以繼續細嘗鵝肝油脂背後的纖細味道。

以往都食咗唔少鵝肝，通常都係原片煎的為主，食的都是油的甘香。今次食完呢味菜之後，終於明白鵝肝的可塑性原來比想像的更高，能夠成為西菜三大食材之一真係當之無愧。

．

我點的湯：Les crustacés en bouillon relevé au piment d’Espelette sous un voile anisé。

法式海鮮湯。上面有一片魚、魷魚及蟹子，佢唔係一般常飲的液態湯，似固態的凍湯，不過係熱的那一種，之前未試過，所以唔知點表達．．．湯底有兩層，感覺比一般蒸水蛋有質感得來仲要滑上好幾倍，味道當然係香濃冇腥的海鮮味啦，至於用乜食材去煮就真係分唔到啦。不過敗筆之處就係係蟹子上面，唔好比張相騙到，泡沫的下面仲有的薄薄的一層。太多的蟹子令口部好難去協調個食法，如絲般嫩滑的熱湯要用舌頭去品嚐，但係脆口的蟹子就要用牙齒去嘴嚼，同一時間有等同比例高對比質感的食物入口，攪到個口唔知點食，顧此而失彼．．．我覺得蟹子的份量應該少少做個對比就足夠啦．．．另外唔知點解塊魚肉比個湯帶咗少許少許腥味出來

．

La Saint-Jacques, le calmar et la crevette dans une nage coralline parfumée au basilic

老婆點的帶子、魷魚及蝦。精緻的擺佈，大小比例恰到好處。蝦肉釀咗係意粉內，我食咗少少淨蝦肉就覺得一般啦，爽彈的口感當然比唔上中式蝦丸，不過味道的比例就好平衡，靈魂應該在於汁液上，我冇食到，所以唔知整體的表現如何。

．

Le blanc de bar en peau croustillante, pommes de terre fondantes safranées et légumes

croquants

我點的海鱸。食完呢片魚，真係投晒降。魚肉唔係頂級貨色，但係煮魚的技巧真係絕對頂級，係塊魚皮煎到香脆的同時又可以保持整片魚皮係平直的，另外魚肉係用Juicy來形容，無一般坊間煎魚的乾身感覺，似用浸煮的形式來烹調。醬汁當然又係菜色的靈魂啦，有薯仔粒及脆口的蔬菜粒，三者要一起吃先可以領略到菜色的特點。

未食過咁美味的薯茸，重牛油、芝士．．．仲有啲野，食唔出，始終年紀唔細，油脂太高的食物都係淺嚐就夠啦，個人偏好牛油味淡多一點會更好。

之前的幾道菜色花咗好大力氣去細緻品嚐咁纖細的味道，個味覺到呢刻已經開始遲緩．．．

．

餐後有甜品或芝士揀。

甜品車。

拿破侖。豐厚吉士層，啲鮮雲尼拿籽好似唔洗錢咁，好濃好香，另外個脆皮啲焦糖味真係香而不燶。吉士及脆皮的比例已經調好，試過酥皮加少少吉士，焦糖的燶味會搶過晒啲吉士的雲尼拿香味，一定要依足比例先可以品嚐到整體的平衡點。

檸檬撻加焦糖雪糕。撻底有一片金箔的，冇食到，唔知乜味。

Floating Island。

老婆對四款甜品好滿意．．．

．

芝士車。

點咗四款芝士，講過名稱，唔記得，有藍芝士、羊芝士、軟及硬的芝士，伴以杏脯乾及提子。芝士保存得好好，唔會食到有其他芝士本身應有以外的味道，食芝士的年資仲淺，唔識點形容，總之比超市芝士櫃位買到的更美味。

再加多一籃麵包．．．

再來一杯濃咖啡，味道就一般，不過可以消下之前食物的油膩感。

．

整體的感覺良好，尤其係以一個低廉的價錢可以食到這樣水準的法國餐，簡直係超值，而呢個價錢在香港只可以食到裝修．．．

過大海之前都有去過某大食評網站睇下食物的相片及"評語"，結果都係得啖笑．．．全部"食評人"都係用呢系列午餐去評級．．．

如果不到500元一餐可以食到真正三星的出品，我真係好想知以四倍以上價錢的晚餐會係一頓怎麼樣的晚餐

另外侍應控制供酒的速度好好，好多時係當地其他餐廳會不斷的給你添加，如果自己唔記得節制下，有時快到用餐中已經斟完，當然現在飲酒的速度已經調節得好好，在用餐的過程中冇一種比人迫飲的感覺。

多謝何生將一間咁好的餐廳帶到梳打埠。