20091017@攞野比乒乒食

過梳打埠之前，乒乒媽媽的朋友身痕話要食野。

咁返來咪入去搵下乒乒，順便比啲新野佢食下囉。點知有人話唔食，咁乒乒肥肥又可以舒舒服服咁食晚餐啦。

去咗厚德街市買餸，見有南非龍蝦賣，70蚊兩隻，要咗四隻。

去味道買咗隻冰鮮有機雞，芝士等等食材。

返來就即刻洗淨隻雞，用鹽塗抹好個雞腔，再加入蔥頭碎、蒜泥、黑胡椒碎、牛至、薑汁、生抽、老抽、味醂及料酒去醃隻雞，由於時間唔夠，醃料落得好重手。

入焗爐先用180度上下火焗背十分鐘，反轉再焗十分鐘，之後再反轉用鋁箔包髀翼加廿度多焗五分鐘，再反轉又多多焗五分鐘，除去鋁箔加風扇多焗三分鐘。

拿出放涼再切。

由於隻龍蝦係雪藏的，先開後邊加少許胡椒粉。

等隻雞差不多煮好就開始煮個芝士汁，藍芝士、比薩芝士加拔蘭地開好個芝士汁。淋上蝦肉上再補少少比薩芝士，灑上麵包糠入焗爐用180度底火焗五分鐘，再用Grill風扇加30度焗香個面。不過由於要整其他食物，冇乜時間理佢，否則個效果應該可以仲好啲。

焗雞中途開始煮意粉，煮好後盛起加少許煮麵水，不時要攪拌防止意粉變乾。待龍蝦入爐之後就開始煮白汁，先炒香意大利煙肉碎，再加入洋蔥碎及蒜泥，炒香後加入麵粉，待炒香後再加入牛油拌勻，慢慢加入3.6牛奶及水開稀，加入洋蔥煮至熟透，將意粉回鑊及煮熱後加入忌廉熄火。

另外又用葉氐出品的XO醬炒咗碟唐蒿，由於火力唔夠，先炒唐蒿至八成熟，其間真係出好多水，盛起後再燒熱隻鑊後加入XO醬及砂糖，炒香後再將菜回鑊，用魚露調味。

最後乒乒肥肥當然有新菜色食啦，龍蝦肉燒雞胸蝦子撈粗意粉，啲蝦子係啱啱係澳門買回來的。

今日乒乒換咗新電話玲聲，隻手食緊聾咯，錄唔到。